സ്വതന്ത്രസോഫ്റ്റ്‌വെയർ – ആശയവും പ്രായോഗികതയും

മനുഷ്യന്റെ ഇന്നേവരെയുള്ള സാംസ്കാരിക സാമൂഹികമുന്നേറ്റങ്ങളെ മുൻവിധികളോടുകൂടിയല്ലാതെ അവലോകനം ചെയ്താല്‍ ഒരു വസ്തുത മനസ്സിലാകും. തനിക്കു മുന്‍പേയുള്ള കണ്ടെത്തലുകളെ പിന്‍പറ്റിയാണ് എക്കാലത്തും പുരോഗതി നടന്നിട്ടുള്ളത്. തീയുടേയും ചക്രത്തിന്റെയും ഇരുമ്പിന്റെയുമെല്ലാം കണ്ടുപിടിത്തത്തെ പകർപ്പവകാശപത്രത്തിലൊതുക്കിയിരുന്നെങ്കിൽ നാമിപ്പോഴും ശിലായുഗത്തിലോ മറ്റോ ആയിരുന്നേനെ. ഒരു സാമൂഹികജീവി എന്ന വിവക്ഷയെ ഏറ്റവും അന്വർത്ഥമാക്കും വിധം വൈവിധ്യപൂർണ്ണമായി സമൂഹത്തെ ആശ്രയിക്കുന്നതു ഒരുപക്ഷേ മനുഷ്യനാകും. ഏതേണ്ടെല്ലാത്തരം ആവശ്യപൂർത്തീകരണത്തിനുമായി നിരന്തരമെന്നോണം സമൂഹവുമായി അവനു ബന്ധപ്പെടേണ്ടതുണ്ട്. ഭക്ഷണരീതികളും, വസ്ത്രധാരണവും, പെരുമാറ്റവും, ഭാഷയും, വിനിമയരീതികളും ലൈംഗികബന്ധത്തെപ്പറ്റിയുമെല്ലാം ജീവിതയാത്രയിൽ ഇപ്രകാരം സ്വാംശീകരിക്കുകയാണ് ചെയ്യുന്നത്. സമൂഹവുമായി നിരന്തരം സമ്പർക്കത്തിലേർപ്പെടുന്നതു മൂലമുണ്ടാകുന്ന അനുഭവങ്ങളാവും ഇക്കാര്യത്തിൽ അവന്റെ ഏറ്റവും വലിയ അദ്ധ്യാപകൻ. ഇത് മരണം വരെ തുടരുകയും ചെയ്യും. ഇങ്ങനെ സമൂഹത്തിൽ നിന്നും ഒട്ടനവധി കാര്യങ്ങൾ പഠിച്ചെടുക്കുന്ന ഒരു വ്യക്തി ഇതിന്റെ നൂറിലൊരംശമെങ്കിലും തിരിച്ചു സമൂഹത്തിനു നൽകുന്നുണ്ടോ എന്നു ചോദിച്ചാൽ ഇല്ലെന്നു തന്നെ പറയേ‌ണ്ടി വരും.

evolution-man-computer

സാങ്കേതിക മേഖലകളിൽ താരതമ്യേന നവജാതനാണ് സോഫ്റ്റ്‌വെയർ വ്യവസായം. എന്നാൽ ഇക്കാലയളവിനുള്ളിൽ തന്നെ മറ്റെല്ലാ മേഖലകളിലും കടന്നാക്രമിച്ച് തന്റേതായ ഒരു സ്വാധീനം ചെലുത്താൻ സോഫ്റ്റ്‌വയറുകൾക്ക് കഴിഞ്ഞിട്ടുണ്ട്. സോഫ്റ്റ്‌വെയർ കടന്നു ചെല്ലാത്ത മേഖലകളൊന്നും ഇപ്പോളില്ലെന്നു തന്നെ പറയാം. ഹാർഡുവെയറുകളോടെ കൂടി തന്നെ പിറവിയെടുത്ത പ്രോഗ്രാമുകൾ ഇന്നു കാണുന്നതിന്റെ ആദ്യ ചുവടുവയ്പ്പുകൾ നടത്തിയത് അൻപതുകളോടെയാണ്. അന്നൊക്കെ ഭീമമായ തുക കൊടുത്തു വാങ്ങുന്ന ഹാർഡ്‌വെയർ ഉത്പന്നങ്ങളൊക്കൊപ്പം സൗജന്യമായാണ് സോഫ്റ്റ്‌വെയറുകൾ നൽകപ്പെട്ടിരുന്നത്. ഹാർഡ്‌വെയർ വാങ്ങുന്നവരുടെ ജോലിയെ എളുപ്പമാക്കുക എന്ന വിചാരത്തോടെ എഴുതിയുണ്ടാക്കിയ ഇവ, നിർമ്മാണരേഖയടക്കം (Source code) എല്ലാവിധ സ്വാതന്ത്ര്യത്തോടെയുമാണ് നൽകപ്പെട്ടിരുന്നത്. ഉപയോക്താക്കൾക്ക് ഏതൊരാവശ്യത്തിനു വേണ്ടിയും ഉപയോഗിക്കാനും, പഠിക്കാനും, പങ്കുവയ്ക്കാനും, മെച്ചപ്പെടുത്തലുകൾ വരുത്താനുമെല്ലാം ഇതനുവദിച്ചു. പലപ്പോഴും ഉപയോക്താക്കൾ വരുത്തിയ മെച്ചപ്പെടുത്തലുകളെ ഹാർഡ്‌വെയർ നിർമ്മാതാക്കൾ തിരികെ സ്വീകരിച്ച് തങ്ങളുടെ തുടർപതിപ്പുകളിൽ കൂട്ടിചേർക്കുന്ന കാഴ്ചയും കാണാമായിരുന്നു. എന്നാൽ അറുപതുകളുടെ അന്ത്യത്തോടെ ഈ അവസ്ഥയ്ക്ക് തിരശ്ശീല വീണു. സോഫ്റ്റ്‌വെയർ വ്യവസായത്തിന്റെ വാണിജ്യതലം മനസ്സിലാക്കിയ കോർപ്പറേറ്റുകൾ ഹാർഡുവെയറിൽ നിന്നും അതിനെ വേർപെടുത്തി പ്രത്യേക വാണിജ്യമേഖലയാക്കി. ഹാർഡ്‌വെയർ വാങ്ങുന്നവർ തങ്ങൾക്കാവശ്യമുള്ള സോഫ്റ്റ്‌വെയർ പ്രത്യേകം പണം കൊടുത്തു വാങ്ങണമെന്ന അവസ്ഥ വന്നെത്തി. മാത്രമല്ല ഉപയോക്താക്കൾ ഇവയുടെ പ്രവർത്തനം എങ്ങനെയെന്നു പഠിക്കാതിരിക്കാൻ പ്രോഗ്രാമുകൾ ബൈനറി എക്സിക്യൂട്ടബിളായി വിതരണം ചെയ്യുന്ന രീതിയും സ്വീകരിച്ചു. ലാഭം പെരുപ്പിക്കുന്നതിനായി അച്ചടി മേഖലയിൽ നിലനിന്നിരുന്ന പകർപ്പവകാശങ്ങൾ സോഫ്റ്റ്‌വെയർ മേഖലയിലേക്കും വ്യാപിപ്പിച്ചു. വിവരശേഖരങ്ങൾ പെട്ടെന്നു തന്നെ പകർത്താനും പങ്കവയ്ക്കാനും അപഗ്രഥിക്കാനുമുള്ള സൗകര്യത്തെ തടഞ്ഞുകൊണ്ട് ഇത് കമ്പ്യൂട്ടർ പ്രോഗ്രാമുകൾക്ക് ഉടമകളെ സൃഷ്ടിച്ചു. സത്യത്തിൽ ഇവർ പലപ്പോഴും പ്രോഗ്രാമുകളുടെ ശരിയായ മൂല്യങ്ങളും സാധ്യതകളും ജനങ്ങളിലെത്താതിരിക്കാനാണ് ശ്രദ്ധിച്ചത്.

പകർപ്പവകാശസങ്കൽപം അച്ചടിക്കനുസൃതമായാണ് സൃഷ്ടിക്കപ്പെട്ടിരിക്കുന്നത്. അച്ചടിയന്ത്രം മുഖാന്തമുള്ള ഒരു പുസ്തകത്തിന്റെയോ ഉള്ളടക്കത്തിന്റെയോ വൻതോതിലുള്ള പുനരുത്പാദനമാണ് പകർപ്പവകാശം തടഞ്ഞത്. എന്നാൽ അതൊരിക്കലും പങ്കുവയ്ക്കലിന് തടസ്സം സൃഷ്ടിച്ചതുമില്ല. ഒരാളുടെ പുസ്തകം മറ്റൊരാൾക്കു കൂടി വായിക്കാൻ നൽകുന്നതിലോ പേനയും കടലാസുമുപയോഗിച്ച് പകർത്തിയെടുക്കുന്നതിലോ അച്ചടിയുടെ പകർപ്പവകാശം കുറ്റവാളികളെ കണ്ടെത്തിയിരുന്നില്ല. എന്നാൽ വ്യക്തികളുടെ ജോലിഭാരം ലഘൂകരിക്കാൻ കണ്ടെത്തിയ കമ്പ്യൂട്ടർ സാങ്കേതികവിദ്യയിൽ ഇവയുടെ പ്രയോഗം മറ്റൊരു തലത്തിലായി. ഡിജിറ്റൽ ഉള്ളടക്കത്തിന്റെ കുറഞ്ഞ സാമ്പത്തികച്ചിലവിൽതന്നെ വളരെപ്പെട്ടന്നു പകർപ്പെടുക്കുവാനും പങ്കുവയ്ക്കാനുമുള്ള സൗകര്യത്തിന് പകർപ്പവകാശം കൂച്ചുവിലങ്ങിട്ടു. സ്വന്തം കൂട്ടുകാരനേയോ സഹപ്രവർത്തകനേയോ സഹായിക്കുന്നതിനായി സോഫ്റ്റ്‌വെയർ പങ്കുവയ്ക്കുന്നയാൾ കടൽക്കൊള്ളകാരനായി (പൈറേറ്റ്) ചിത്രീകരിക്കപ്പെട്ടു. ഒരു സോഫ്റ്റ്‌വയർ നിർമ്മിച്ചു മുതൽമുടക്ക് ലഭിച്ചു കഴിഞ്ഞാൽ അതിന്റെ എത്ര പകർപ്പുകൾ വേണമെങ്കിലും എടുക്കാം. വോൾട്ടേജ് നില വച്ചിട്ടാണു സാധാരണയായി ഒരു വിവരകണികയെ (ബിറ്റ്) രേഖപ്പെടുത്തുന്നത്. ഇതെത്രതവണ വേണമെങ്കിലും ആവർത്തിക്കാം എന്നതുകൊണ്ട് സാങ്കേതികമായി ബിറ്റുകളുടെ കൈയിരുപ്പ് ഏതാണ്ട് അനന്തമാണ്. ഇതിനു വരുന്ന ആകെ ചിലവ് സി.ഡി. പോലുള്ള സംവഹനമാധ്യമത്തിന്റേതു മാത്രമാണ്. ഒരു ഭൗതിക വസ്തുവാണെങ്കിൽ മറ്റൊരാൾക്കു പങ്കുവയ്ക്കുന്നതിലൂടെ യഥാർത്ഥ ഉടമയ്ക്കു നഷ്ടമുണ്ടാന്നു. എന്നാൽ സോഫ്റ്റ്‌വെയർ പങ്കുവയ്ക്കുന്നതിലൂടെ അതു രണ്ടു പേരുടേയും പക്കലെത്തുന്നു. ഇത് സോഫ്റ്റ്‌വെയറിന്റെ പ്രായോഗികതലം വർദ്ധിപ്പിക്കുകയാണ് ചെയ്യുന്നത്.

ഉപയോക്താക്കൾ ഇപ്രകാരം പകർപ്പെടുക്കുന്നത് നിർമ്മാതാക്കളായ കോർപ്പറേറ്റുകൾക്കു നഷ്ടമാണുണ്ടാക്കുന്നെന്ന വാദം അബദ്ധമാണ്. ഇത് കോർപറേറ്റുകളുടെ ലാഭവിഹിതം കുറയ്ക്കുന്നു എന്നത് സത്യമാണ്. എന്നാൽ ഒരിക്കലും നഷ്ടമുണ്ടാക്കുന്നില്ല. ഒന്നു ചിന്തിച്ചാലറിയാം ഈ പകർപ്പെടുക്കുന്ന എല്ലാവരും അല്ലാത്തപക്ഷം സോഫ്റ്റ്‌വെയർ പണം കൊടുത്തു വാങ്ങുകയുണ്ടാവണമെന്നില്ല. എന്നാലും അവർ ഇതിനെ തങ്ങളുടെ നഷ്ടമാക്കി പെരുപ്പിച്ചുകാട്ടുന്നു. കേൾവിക്കാരന് ഭൗതികനാശനഷ്ടങ്ങളുമായി കൂടുതൽ സാമ്യം തോന്നാനായി പ്രോഗ്രാം, പകർത്തൽ എന്നീ പദങ്ങൾക്കു പകരം ബൗദ്ധികസ്വത്ത്, പൈറസി എന്നീ പദങ്ങൾ മനഃപൂർവ്വം പ്രചരിപ്പിക്കാനുള്ള ശ്രമവും ഉടമകളുടെ ഭാഗത്തുകാണാം. ഒരു സ്വകാര്യ സോഫ്റ്റ്‌വെയറിന്റെ കാഴ്ചപ്പാടിൽ സാമൂഹിക പുരോഗതിയേക്കാൾ ലാഭമാണ് വലുത്. തമാശയെന്തെന്നാൽ ഇതിനെ കവച്ചുവച്ച് തങ്ങളുടെ സഹയാത്രികനുമായി പ്രോഗ്രാം പങ്കുവയ്ക്കുന്നവരെ കോർപ്പറേറ്റുകൾ സാമൂഹികവിരുദ്ധമാക്കി ചിത്രീകരിച്ചു. ഞാൻ പണം കൊടുത്തുവാങ്ങിയ സോഫ്റ്റ്‌വെയർ എനിക്കിഷ്ടമുള്ള കമ്പ്യൂട്ടറിൽ എനിക്കിഷ്ടമുള്ള തരത്തിൽ ഉപയോഗിക്കാൻ കഴിയുന്നില്ലെങ്കിൽ അതിലെന്ത് നീതിയാണുള്ളത്. അതിന്റെ പ്രവർത്തനമോ മറ്റോ എനിക്കു സൗകര്യപ്രദമായ രീതിയിൽ പരിഷ്കരിക്കാനാകുന്നില്ലെങ്കിൽ എന്തു പ്രായോഗികതയാണുള്ളത്?

free as in freedom stallman

ഇത്തരത്തിലൊരു സാമൂഹിക അനീതിക്കെതിരെ ആദ്യ ശബുദമുയർത്തിയത് മസാച്ചുസെറ്റ് ഇൻസ്റ്റിറ്റ്യൂട്ട് ഓഫ് ടെക്നോളജിയിൽ സാങ്കേതികവിദഗ്ദനായിരുന്ന റിച്ചാർഡ് മാത്യ സ്റ്റാൾമാനാണ്. സെറോക്സ് പ്രിന്ററുമായി ബന്ധപ്പെട്ടുണ്ടായ ഒരു സംഭവം, ഉപയോക്താക്കളുടെ മേൽ സോഫ്റ്റ്വെയറുകളിലൂടെ കോർപ്പറേറ്റുകൾ നിയന്ത്രണത്തിനെതിരെ പ്രതികരിക്കാൻ പ്രേരിപ്പിച്ചു. സ്വകാര്യസോഫ്റ്റ്വെയറുകൾക്കെതിരെ സ്വതന്ത്രവും പുനരുപയോഗിക്കാനും പങ്കുവയ്ക്കാനും കഴിയുന്ന സോഫ്റ്റ്വെയർ ബദലുകൾ ഉണ്ടാക്കുന്നതിനായി ശേഷജീവിതം മാറ്റിവച്ചു. അദ്ദേഹത്തിന്റെ അഭിപ്രായത്തിൽ ഉപയോക്താവിനു സോഫ്റ്റ്വെയർ മറ്റുള്ളവരുമായി പങ്കിടാനും, പ്രവർത്തനത്തെക്കുറിച്ചു പഠിക്കാനും, അവമുള്ള രീതിയിൽ സോഫ്റ്റ്വെയറിൽ മാറ്റം വരുത്താനും, മാറ്റം വരുത്തിയ പതിപ്പുകൾ സുഹൃത്തുക്കൾക്കുമായി പങ്കിടാനും കഴിയണം. ഈ നാലു അവകാശങ്ങളിന്മേൽ വരുത്തുന്ന ഏതു നിയന്ത്രണവും സ്റ്റാൾമാന്റെ അഭിപ്രായത്തിൽ അസന്മാർഗ്ഗികവും സാമൂഹികവിരുദ്ധവുമാണു്.

സമൂഹത്തെ അടിമത്തത്തിൽ നിർത്താൻ ഏറ്റവും പറ്റിയ മാർഗ്ഗമാണ് അടിസ്ഥാനാവശ്യങ്ങളിൽ വിധേയത്വം നിർമ്മിക്കുക എന്നത്. സാങ്കേതികവിദ്യയടക്കമുള്ള അറിവുകളുടെ കുത്തകവത്കരണം ഇതിനേറ്റവും പറ്റിയ മാർഗ്ഗമാണ്. ഇപ്രകാരം അടിമത്തത്തിലായ സമൂഹത്തിനു ആ സ്ഥിതിയിൽ നിന്നും മാറ്റം വരുന്നതുവരെ പുരോഗതി കൈവരിക്കാനാകുകയില്ല. സ്വതന്ത്രസോഫ്റ്റ്വെയറിലൂടെ ഒരു ആശയത്തിനോ അതിന്റെ പ്രവർത്തതലങ്ങൾക്കോ വേണ്ടി മറ്റൊരാളുടെ മുൻപിൽ കൈനീട്ടുന്നതൊഴിവാക്കുന്നതിലൂടെ സാമൂഹികചൂഷണം എന്ന വ്യവസ്ഥയ്ക്ക്‌ അറുതി വരുത്തുന്നു. ഒരു വ്യക്തിയുടെ അധ്വാനം സമൂഹത്തിന്റെ ആകെ പുരോഗതിക്കായി പങ്കുവയ്ക്കപ്പെടുന്നു. മറ്റൊരാൾക്ക്‌ കൂടി തൽസ്ഥാനത്തെത്താൻ വീണ്ടും സമയവും ഊർജ്ജവും പാഴാക്കേണ്ടതില്ല. ‘ചക്രം വീണ്ടും വീണ്ടും കണ്ടുപിടിക്കുന്നതൊഴിവാക്കി’, അധ്വാനം നിലവിലെ സോഫ്റ്റ്‌വെയർ മെച്ചപ്പെടുത്തുന്നതിനായി ഉപകരിക്കാം. ഇപ്രകാരം സാമൂഹികപുരോഗതിക്ക്‌ ആക്കം കൂട്ടുന്നു. ഒപ്പം ഉപയോക്താവിനു മുൻപിൽ ഒരു ഐച്ഛികം കൂടി നൽകുന്നതിനൊപ്പം അതാതു രംഗത്ത് ഒരു മത്സരം സൃഷ്ടിച്ചുകൊണ്ട് ഉപയോക്താക്കളിലേക്ക് മെച്ചപ്പെട്ട ഉത്പന്നം കുറഞ്ഞ ചിലവിലെത്തിക്കാനും സ്വതന്ത്രസോഫ്റ്റ്വ്വെയർ സഹായിക്കുന്നു.

ഒരു സോഫ്റ്റ്‌വെയരും ഐഡിയൽ എന്നു പറയാൻ കഴിയില്ലെങ്കിലും ഐഡിയലിസം എന്ന നിർവചനവുമായി അടുപ്പിക്കുകയാണു സ്വതന്ത്രസോഫ്റ്റ്‌വെയർ. ഒരു കൂട്ടത്തിനു പകരം സമൂഹത്തിൽ നിന്നും ആശയം ഉൾക്കൊണ്ടും, ഏതൊരാൾക്കും നിർമ്മാണത്തിൽ പങ്കാളിയാവാൻ അവസരം നൽകിക്കൊണ്ടും, ഉപയോക്താക്കളിൽ നിന്നും പിശകുകൾ മറയ്ക്കാതെ പൊതുവായി ട്രാക്ക്‌ ചേയ്തപ്പെട്ടും ആ നിർവചനത്തെ യാഥാർത്ഥ്യമാക്കാൻ ശ്രമിക്കുന്നു. സോഫ്റ്റ്‌വെയറിന്റെ മെച്ചപ്പെടുത്തലും അതുവഴി മാനവസമൂഹത്തിന്റെ പുരോഗതിക്കുമാണു് വഴിവയ്ക്കേണ്ടതു്. സോഫ്റ്റ്‌വെയർ നിർമ്മിക്കുന്നതും മാനദണ്ഡങ്ങൾ തീരുമാനിക്കുന്നതുമായ ഒരു ഉടമസ്ഥനോ ഫൗണ്ടേഷനോ ഉണ്ടെങ്കിൽ കൂടി അതിന്റെ ഉപയോഗ തലങ്ങൾ എപ്രകാരമാവുമെന്നത്‌ ഉപയോക്തൃസമൂഹമാവും നിർവ്വചിക്കുക. ഇത്തരം സോഫ്റ്റ്വെയറുകളുടെ പരിപാലനത്തിനു അതാതിടത്തെ മനുഷ്യവിഭവം ഉപയോഗപ്പെടുത്താമെന്നതിനാൽ പ്രാദേശികമായ തൊഴിലവസരങ്ങൾ വർദ്ധിപ്പിക്കുന്നു.

സോഫ്റ്റ്വെയർ രംഗത്തെ കുത്തകവത്കരണത്തിനു ഏതാണ്ടു സമാനമാണു് ഇന്റർനെറ്റിന്റെ ഇന്നത്തെ അവസ്ഥയും. അഭിപ്രായസ്വാതന്ത്രത്തിന്റെയും വിവരവിതരണത്തിന്റെയും അവസാന തുരുത്തായിരുന്ന ഇന്റർനെറ്റ് ഇന്ന് കടുത്ത നിയമങ്ങൾക്കു വിധേയമായി വളച്ചൊടിക്കപ്പെട്ടിരിക്കുന്നു. ഇന്നു നിത്യജീവിതത്തിൽ എല്ലാ തുറകളിലും – വ്യാപാരവിനിമയങ്ങൾ മുതൽ ഭരണം വരെ, കൃത്യമായ സ്വാധീനം ചെലുത്തുന്ന, ഇന്നത്തെ സംവാദക്ഷമമായപൊതുമണ്ഡലങ്ങളായ ഇന്റർ‌നെറ്റിനെ നിയന്ത്രിക്കുന്നതോടെ ജനങ്ങളെ നിയന്ത്രിക്കാമെന്ന അവസ്ഥവരുന്നു. പുതിയൊരു അറബുവസന്തവും വാൾസ്ട്രീറ്റ് പിടിച്ചടക്കലുമെല്ലാം ഇന്ത്യയിലെ റദ്ദാക്കപ്പെട്ട 66A പോലുള്ള കരിനിയമങ്ങൾ മുതൽ ചൈനയുടെ ഗ്രേറ്റ് ഫയർവാളും അമേരിക്കയുടെ SOPA-PIPA നിയമങ്ങളുമെല്ലാം ഒരേതൂവൽ പക്ഷികളാണ്.

ഇതിനെതിരെയുള്ള പ്രതിഷേധത്തിന്റെ അനുരണനങ്ങൾ പലവിധത്തിൽ ലോകത്തിന്റെ പലഭാഗത്തു നിന്നായി ഉയർന്നു വന്നുകൊണ്ടിരിക്കുന്നു. കോർപ്പറേറ്റുകൾ പൈറേറ്റുകൾ എന്നു വിളിക്കുന്ന ജനവിഭാഗം സംഘടിച്ച് ഒരു രാഷ്ട്രീയ പാർട്ടിയായ് മാറിയ അവസ്ഥയാണ് ഇതിൽ പ്രധാനം. ഏതാണ്ടെല്ലാ പ്രമുഖ കുത്തകസോഫ്റ്റ്വെയറുകൾക്കും ബദൽ സോഫ്റ്റുവെയറുകൾ ഇന്നു ലഭ്യമാണു്. ബിറ്റ്കോയിൻ, ഡയാസ്പുറ, ടോർ മുതലായ സർവൈലൻസ് വിരുദ്ധമുന്നേറ്റങ്ങളും കൂട്ടിവായ്ക്കാവുന്നതാണു്. എന്തായാലും സ്വതന്ത്രസോഫ്റ്റ്വെയർ പ്രസ്ഥാനങ്ങൾ, സാങ്കേതികവിദ്യയുടെ വളർച്ചയുടെ വ്യാപനത്തിനു ഹേതുവാകുന്നതോടൊപ്പം, കൂട്ടുത്തരവാദിത്വത്തോടെയുള്ള സാമൂഹികപുരോഗതിക്കു കാരണമാകുമെന്നതിൽ തർക്കമൊന്നുമില്ല.

ആരോൺ, ഒരു സ്വാതന്ത്ര്യപ്പറവയുടെ പതനം

2013 ഫെബ്രുവരി 25നു് മലയാ.ളത്തിൽ പ്രസിദ്ധീകരിച്ച ലേഖനം. ആർക്കൈവിങ്ങിനായി ഇവിടെ. അഭിപ്രായം/സംശയം അവിടെ ചേർക്കുക.

വീണ്ടുമൊരു കൊലപാതകത്തിനു് ഞാനും  നിങ്ങളുമടങ്ങുന്ന ഈ സമൂഹം കാരണമായിരിക്കുയാണു്. പുറത്തുനിന്നു നോക്കുന്ന ഒരാള്‍ക്ക് പ്രഥമദൃഷ്ട്യാ കൊലപാതകമെന്നു തോന്നില്ലെങ്കിലും ഇതൊരു നരഹത്യയാണു്. നിറയെ സ്വപ്നങ്ങളുമായി വിഹായസ്സിലേക്കു് പറന്നു തുടങ്ങിയ അമേരിക്കന്‍ പ്രോഗ്രാമറും ഹാക്ടിവിസ്റ്റുമായ ആരോണ്‍ സ്വാര്‍ട്സ് എന്ന ചെറുപ്പക്കാരനാണു് ഇക്കഴിഞ്ഞ ജനുവരി 11നു് തന്റെ ഇരുപത്തിയാറാം വയസ്സില്‍ ഭരണകൂടത്തിന്റെ വേട്ടയാടലുകളും കോടതി മുറിയിലെ വാദപ്രതിവാദങ്ങളും അതു സൃഷ്ടിച്ച മാനസിക സംഘര്‍ഷങ്ങളും സഹിക്കവയ്യാതെ മരണത്തിനു കീഴടങ്ങിയതു്.

ശ്രദ്ധേയമായ വിദ്യാഭ്യാസസൈറ്റുകള്‍ക്കു് നല്കുന്ന ആര്‍സ്‌‌ഡിജിറ്റാ പുരസ്കാരം  പതിമൂന്നാംവയസ്സില്‍ തന്നെ നേടി തന്റെ പ്രതിഭ തെളിയിച്ചവനാണു് ആരോണ്‍ സ്വാര്‍ട്സ്. Image ഇതിനോടനുബന്ധിയായി പ്രമുഖരുമായി കൂടിക്കാഴ്ചയ്ക്ക് അവസരം  ലഭിച്ച ആരോണ്‍ അവരില്‍ നിന്നുള്ള പ്രചോദനമുള്‍ക്കൊണ്ട് തൊട്ടടുത്ത കൊല്ലം വെബ്‌‌ഫീഡ്സ് നിര്‍മ്മിക്കാനുപയോഗിക്കുന്ന ആര്‍.എസ്.എസ്. എന്ന ഫയല്‍ തരത്തിനു് അടിസ്ഥാനം  നല്‍കുന്നതില്‍ പ്രധാന പങ്ക് വഹിച്ചു. ഇന്നു പ്രശസ്തമായി മാറിയ സാമൂഹ്യ വാര്‍ത്താസൈറ്റായ റെഡിറ്റിന്റെ നിര്‍മ്മാതാവെന്ന നിലയിലും  വെബ്‌‌ പൈ എന്ന വെബ്‌‌ ആപ്ലിക്കേഷന്‍ ഫ്രെയിംവര്‍ക്കിന്റെ ശില്പി എന്ന നിലയിലും  താരമാകുന്നതാണു് പിന്നീട് കണ്ടതു്. 2006ല്‍ ഓപ്പണ്‍ലൈബ്രറി എന്ന പുസ്തകകാറ്റലോഗ് സൈറ്റിനു ചട്ടക്കൂടൊരുക്കുവാന്‍ ആരോണിനായി. അമേരിക്കന്‍ കോണ്‍ഗ്രസ് ലൈബ്രറിയിലെ 95 ശതമാനത്തിലധികം  ഉള്ളടക്കം  ഡൗണ്‍ലോഡ് ചെയ്ത് ഇവിടെയെത്തിക്കുന്ന പ്രവര്‍ത്തനത്തിലും  ആരോണ്‍ വിജയം  കണ്ടു.   2008ഓടെ സാമൂഹികപ്രവര്‍ത്തനത്തിലേക്ക് ശ്രദ്ധതിരിച്ച ആരോണ്‍  രാഷ്ട്രീയക്കാരുടെ വിവരങ്ങള്‍ ശേഖരിക്കുകയും  സ്വന്തമായി പെറ്റീഷനും ക്യാമ്പയിനിങ്ങും  മറ്റും  തുടങ്ങാന്‍ സഹായിക്കുന്ന വാച്ച്‌‌ഡോഗ് എന്ന സൈറ്റിനു തുടക്കമിട്ടു. മൂന്നു തലത്തിലായി പ്രവര്‍ത്തിച്ച ഈ സൈറ്റ് ഒരു പ്രോഗ്രാമര്‍ക്ക് എങ്ങനെ രാഷ്ട്രീയസേവനം  നടത്താം  എന്നതിനു ഒരു ഉദാത്തമാതൃകയായി. കൃത്യമായ നയങ്ങളിലൂടെ മാത്രമേ സുശക്തമായ സര്‍ക്കാര്‍ നിലനില്ക്കുകയുള്ളൂവെന്നും,  അതിനുള്ള പ്രവര്‍ത്തനം  അടിത്തട്ടില്‍ നിന്നും  തുടങ്ങണം  എന്നും  വിശ്വസിച്ചതിനാലാകാം  ആരോണ്‍ ഡിമാന്റ് പ്രൊഗ്രസ് എന്ന സംഘടനയ്ക്ക് രൂപം  നല്കാന്‍  കൂടിയതു്. ഇതിലൂടെയാണു് സോപ – പിപ മുതലായ കരിനിയമങ്ങളെ ആരോണ്‍ പരിചയപ്പെടുന്നതു്. സോപയ്ക്കെതിരെയുള്ള പ്രക്ഷോഭങ്ങളില്‍ മുന്‍നിരപ്പോരാളി തന്നെയായിരുന്നു ആരോണ്‍. ഒന്നര കൊല്ലത്തോളം  നീണ്ട പോരാട്ടത്തിനൊടുവില്‍ സോപ കീഴടങ്ങിയപ്പോള്‍ അതിനായി  ആരോണ്‍ വഹിച്ച പങ്ക് മറക്കാവുന്നതല്ല.

ഒരു സുഹൃത്താണു് ആരോണിനു് ലാറി ലെസിങ്ങിനെ പരിചയപ്പെടുത്തിക്കൊടുക്കുന്നതു്. അദ്ദേഹവുമായി വളരെ നല്ല വ്യക്തിബന്ധത്തിലായ ആരോണ്‍, ലെസിങ്ങിനെ ക്രിയേറ്റീവ് കോമണ്‍സ് എന്ന പ്രസ്ഥാനം  ആരംഭിക്കുന്നതിലും  മറ്റും  വളരെയധികം  സഹായിച്ചു. ക്രിയേറ്റീവ് കോമണ്സ് സാങ്കേതികവിദ്യാ‌ ടീമിലെ ഒരു പ്രധാനിയായി തന്നെ ആരോണ്‍ മാറി. വളരെയധികം  ശക്തവും ആഴത്തിലുള്ളതുമായ വിജ്ഞാന സ്വാതന്ത്ര്യബോധം  ആരോണിലുണ്ടാക്കാന്‍ ഈ പ്രവര്‍ത്തങ്ങള്‍ സഹായിച്ചു എന്നുവേണം  കരുതാന്‍. സമാന ചിന്താധാരയുള്ള വിക്കിലീക്സുമായും  അനോണിമസുമായും  പിന്നീടു് ആരോണ്‍ സഹകരിച്ചതു് ഇതിനു് അടിവരയിടുന്നു. 2008ല്‍ ആരോണ്‍ തയ്യാറാക്കിയ ഗറില്ല ഓപ്പണ്‍ ആക്സസ് മാനിഫെസ്റ്റോയില്‍ ഓപ്പണ്‍ ആക്സസ് എന്ന ആശയത്തെ വ്യക്തമായി വിഭാവന ചെയ്തിട്ടുണ്ടു്. ലോകത്തിന്റെ സാംസ്കാരിക ശാസ്ത്രപൈതൃകം  കുത്തകകളുടെ കയ്യില്‍ മാത്രമായി ഒതുങ്ങുന്നതിലെ അപകടവും  ഇതില്‍ പ്രതിപാദിച്ചിട്ടുണ്ടു്.

സ്വതന്ത്ര വിജ്ഞാനകോശമായ വിക്കിപീഡിയയുടെ സജീവ ഉപയോക്താവായിരുന്നു ആരോണ്‍.അതില്‍ തന്റെ പ്രവര്‍ത്തനമേഖലയുമായി ബന്ധപ്പെട്ട ലേഖനങ്ങള്‍ മെച്ചപ്പെടുത്തുന്നതില്‍ ആരോണ്‍ പ്രത്യേക താത്പര്യം  കാണിച്ചിരുന്നു. 2006ല്‍ വിക്കിമീഡിയ ഫൗണ്ടേഷന്റെ ബോര്‍ഡ് ഓഫ് ട്രസ്റ്റീസ് തിരഞ്ഞെടുപ്പില്‍ മത്സരിച്ചെങ്കിലും പരാജയപ്പെട്ടു. എന്നിരുന്നാലും  വിക്കിപീഡിയയുടെ പ്രവര്‍ത്തനരീതികളെപ്പറ്റിയും  നയങ്ങളെപ്പറ്റിയും ആരോണ്‍  തന്റെ ബ്ലോഗിലെഴുതിയ പോസ്റ്റുകള്‍ വളരെ പ്രസിദ്ധമായി. ഒരു ജനാധിപത്യ രാഷ്ട്രത്തിനു പോലും  അനുവര്‍ത്തിക്കാവുന്ന പ്രവര്‍ത്തനങ്ങളുടെ ഒരു ഉദാത്ത മാര്‍ഗ്ഗരേഖ എന്ന നിലയിലും അവ സ്തുത്യര്‍ഹമായി.

2011 ജൂലൈയിലാണു് ആരോണിനെ ജസ്റ്റര്‍ എന്ന ഓണ്‍ലൈന്‍ സൈറ്റ് ആക്രമിച്ചു വിവരങ്ങള്‍ ചോര്‍ത്തി എന്ന കുറ്റമാരോപിച്ചു് അറസ്റ്റ് ചെയ്യുന്നതു്. സര്‍വ്വകലാശാലകളിലും  നിന്നും  മറ്റുമുള്ള ഗവേഷണ പ്രബന്ധങ്ങള്‍ ഡിജിറ്റല്‍വത്കരിച്ച് അവ അല്പം  ഉയര്‍ന്ന തുകയ്ക്ക് തന്നെ വില്പന നടത്തുകയാണു് ജസ്റ്ററിന്റെ പ്രവര്‍ത്തനം. ഇവയുടെ ഒരു ഭാഗം  പോലും  പ്രബന്ധരചയിതാക്കള്‍ക്ക് പോകുന്നില്ല എന്നതാണു് വാസ്തവം. 2010 അവസാനത്തോടെ മസാഷുസെറ്റ്സ് ഇന്‍സ്റ്റിട്യൂട്ട് ഓഫ് ടെക്നോളജി  (എം.ഐ. ടി.) എന്ന ഗവേഷണ സര്‍വ്വകലാശാലയിലെ ശൃംഖലയില്‍ നുഴഞ്ഞുകയറി 48 ലക്ഷം ലേഖനങ്ങളാണു് ആരോണ്‍ കൈവശപ്പെടുത്തിയതു്. ഡൗണ്‍ലോഡ് റിക്വസ്റ്റ് നല്കുന്നതിനായി ഒരു സ്ക്രാപ്പര്‍ സോഫ്റ്റ്‌‌വെയര്‍ പോലും (keepgrabbing.py) ആരോണ്‍ സ്വന്തമായി എഴുതിയുണ്ടാക്കി. ഇതറിഞ്ഞ ജസ്റ്റര്‍ ആരോണിന്റെ ഐ.പി.യെ ബ്ലോക്ക് ചെയ്തപ്പോള്‍ അവന്‍ തന്റെ ഐ.പി. മാറ്റി. മിറ്റ് അവന്റെ കമ്പ്യൂട്ടറിന്റെ നെറ്റ്‌‌വര്‍ക്ക് ആക്സസ് എടുത്തുകളഞ്ഞപ്പോള്‍ ആരോണ്‍ മാക്ക് അഡ്രസ് മാറ്റി ശ്രമം  തുടര്‍ന്നു.  മോഷണക്കുറ്റത്തോടൊപ്പം ഈ വിവരം  ടൊറന്റ് അടക്കമുള്ള ഷെയറിങ്ങ് സൈറ്റുകള്‍ക്ക് പങ്ക് വയ്ക്കാന്‍ ആരോണ്‍ ശ്രമിച്ചു എന്നതാണു് ആരോണിനെതിരെയുള്ള കേസ്.

Image

ഇതാദ്യമായല്ല വിവരം സ്വതന്ത്രമാക്കുന്ന ഒരു പ്രവര്‍ത്തനത്തില്‍ ആരോണ്‍ ഏര്‍പ്പെടുന്നതു്. അമേരിക്കന്‍ പോലീസ് നിയമരേഖകളുടേയും  അനുബന്ധഘടകങ്ങളുടേയും  സംഭരണിയായ പേസറാണു് ആരോണിന്റെ സാങ്കേതികത്തികവിനു മുന്‍പില്‍ ആദ്യം  കീഴടങ്ങിയതു്. പൊതുസഞ്ചയത്തിലുള്ള വിവരങ്ങള്‍ പോലും  തിരയുന്നതിനു പണമീടാക്കിയ പേസറിനെതിരെ റീക്കാപ് (PACER എന്നതു് തലതിരിച്ചെഴുതിയതു് – RECAP) എന്ന സോഫ്‌‌റ്റ്‌‌വെയറുപയോഗിച്ചായിരുന്നു ആരോണിന്റെ പോരാട്ടം. ഓരോ തവണ പേസറില്‍ നിന്നും  ഉപയോക്താക്കള്‍ വിവരങ്ങള്‍ നേടുമ്പോഴും  അതിന്റെ ഒരു പ്രതി ഇന്റര്‍നെറ്റ് ആര്‍ക്കൈവിലേക്ക് സ്വതേ അപ്ലോഡ് ചെയ്യപ്പെടുകയും  പിന്നീടുള്ളവര്‍ക്ക് പണം  മുടക്കാതെ തന്നെ ഈ ഉള്ളടക്കം  ഉപയോഗിക്കാവുന്ന തരത്തിലായിരുന്നു ഇതിന്റെ നിര്‍മ്മാണം. ഏതാണ്ടു് 19 ലക്ഷത്തോളം (20 ശതമാനം  ഉള്ളടക്കം) താളുകള്‍ ആരോണ്‍ ഇപ്രകാരം  സ്വതന്ത്രമാക്കി. ഇതിനെതിരെ എഫ്‌‌.ബി.ഐ അന്വേഷണം  നടത്തിയെങ്കിലും   പൊതുസഞ്ചയത്തിലായ ഉള്ളടക്കം  ഏതുവിധേനയുള്ള പുനരുപയോഗത്തിനും  സാധ്യമാണു് എന്ന വസ്തുത ആരോണിനു് തുണയായി. ആരോണ്‍ നയിച്ച ഓണ്‍ലൈന്‍ വിവരസ്വാതന്ത്ര്യത്തിനായുള്ള ക്യാമ്പയിനിങ്ങിന്റെ രണ്ടാം ഘട്ടപോരാട്ടമായിരുന്നു എം.ഐ.ടി.യിലേതു്.

എന്നാല്‍ ഇപ്രാവശ്യം  നിയമക്കുരുക്കുകള്‍ അത്ര ലഘുവായല്ല ആരോണിനെ ചുറ്റിവരിഞ്ഞതു്. കമ്പ്യൂട്ടര്‍ ഫ്രോഡ് ആന്റ് അബ്യൂസ് ആക്ട് പോലുള്ള നിയമങ്ങളിലൂടെ പതിമൂന്നോളം  കേസുകള്‍ ആരോണില്‍ ചാര്‍ത്തപ്പെട്ടു. ഇതുവഴി മുപ്പത്തിയഞ്ച് കൊല്ലം  വരെ തടവു ശിക്ഷ ലഭിക്കാവുന്ന തരത്തില്‍ സംഗതികള്‍ വഷളായി. ആരോണ്‍ അറസ്റ്റു ചെയ്യപ്പെട്ടു. പണമുണ്ടാക്കുക  എന്ന ലക്ഷ്യത്തോടെയല്ല ആരോണ്‍ ഈ പോരാട്ടങ്ങളിലൊന്നും  ഏര്‍പ്പെട്ടതു്. റെഡിറ്റിന്റെ വില്പനയിലൂടെ കുട്ടിക്കാലത്തു് തന്നെ സമ്പന്നനായ ആരോണിനു പണം ഒരിക്കലും പ്രേരകശക്തിയായിരുന്നില്ല. മറിച്ച് സാമൂഹിക നന്മ മാത്രമായിരുന്നു ലക്ഷ്യം. ഇക്കാര്യം   ലെസിഗ് തന്റെ ബ്ലോഗിലെഴുതിയ ആരോണ്‍ അനുസ്മരണത്തില്‍ വ്യക്തമാക്കുന്നുണ്ടു്.

വാസ്തവത്തില്‍ ആരോണിനു് ജസ്റ്ററില്‍ നിന്നും  ഡൗണ്‍ലോഡ് ചെയ്യാന്‍  എല്ലാ വിധ സ്വാതന്ത്ര്യവുമുണ്ടായിരുന്നു. അദ്ദേഹം  കമ്പനിയുടെ ‘അനുമതിപത്രത്തിലെ’  ഉള്ളടക്കം  പങ്ക് വയ്ക്കില്ല എന്ന നിബന്ധന മാത്രമാണു് തെറ്റിച്ചതു്. കൃത്യമായ ഒരു ഇരയില്ലാത്തതിനാലും  തന്റെ കയ്യിലുള്ള വിവരങ്ങള്‍ ആരോണ്‍ തിരിച്ചു നല്‍കിയതിനാലും  കേസ് പിന്‍വലിക്കാന്‍ ജസ്റ്റര്‍ തയ്യാറായിട്ടും  ഭരണാധികാരികള്‍ ഇതിനു തയ്യാറായില്ല. ഭരണകൂടഭീതി എന്ന ആയുധത്തെ അരക്കെട്ടുറപ്പിക്കുവാന്‍ വേണ്ടി നിയമം  ആരോണിനെ കരുവാക്കി. രാജാവിനെക്കാളും  വലിയ രാജഭക്തികാണിക്കുന്ന നിയമജ്ഞര്‍ ആരോണിനെ ദശാബ്ദങ്ങള്‍ നീണ്ട കഠിനതടവും  ലക്ഷങ്ങളുടെ പിഴവും  വിധിക്കാവുന്ന സാഹചര്യത്തിലേക്കു് നയിച്ചു.  സാമൂഹികനന്മ മാത്രം  പ്രതീക്ഷിച്ചിരുന്ന ആ മനസ്സിനു് കോടതിമുറിയിലെ വാദമുഖങ്ങള്‍ക്കു് മുന്‍പില്‍ പലപ്പോഴും  പിടിച്ചു നില്‍ക്കാന്‍ കഴിഞ്ഞില്ല. തന്റെ ബാക്കിജീവിതം  ഇരുമ്പഴിക്കുള്ളില്‍ ഒരു കുറ്റവാളിയായി ജീവിച്ചുതീര്‍ക്കുന്നതു് സ്വാതന്ത്ര്യവാദിയായ  അവനിഷ്ടപ്പെട്ടിരുന്നില്ല.  ഇതു് ആരോണിനെ ഒരു വിഷാദരോഗിയാക്കി മാറ്റി. ജനുവരി 11നു രാവിലെ ഒരു സുഹൃത്തിന്റെ വീട്ടിലാണു് ആരോണിനെ ആത്മഹത്യ ചെയ്ത നിലയില്‍ കണ്ടെത്തിയതു്.

Image

ടിമോത്തി ലീ എഴുതിയതു് ശരിയാണെങ്കില്‍ ആരോണ്‍ ചെയ്ത കുറ്റത്തിനു് – ശൃഖലയില്‍  അതിക്രമിച്ചു കടക്കലിനു്, നല്കാവുന്ന പരമാവധി ശിക്ഷ നൂറു് ഡോളര്‍ പിഴയും 30 ദിവസത്തെ ജയില്‍ വാസവുമാണു്.വര്‍ഷങ്ങളായി ഭരണകൂടത്തിനെതിരെ നടത്തിയ പ്രക്ഷോഭങ്ങള്‍ മുന്‍നിര്‍ത്തി ഏകപക്ഷീയമായാണു് ആരോണിനു ശിക്ഷ വിധിച്ചതെന്നു കരുതുന്നവരും  കുറവല്ല.ആരോണിന്റെ യുദ്ധം  – ഇന്റര്‍നെറ്റിലെ ഉള്ളടക്കത്തെ ആരു നിയന്ത്രിക്കണമെന്നതും  അതിന്റെ സ്വാതന്ത്ര്യത്തെയും കുറിച്ചുള്ളവ, അമേരിക്കന്‍ ഭരണകൂടത്തിന്റെ കണ്ണില്‍ മഹാപരാധമായി മാറിയതിന്റെ പ്രത്യാഖാതമാവും ഇതു്. ലോകത്തിന്റെ പല ഭാഗങ്ങളില്‍നിന്നും ആരോണിന്റെ വിമോചനത്തിനായി ഉയര്‍ന്ന അപേക്ഷകളെ ഭരണസംവിധാനം നിരാകരിച്ചു. ഇതാദ്യമായല്ല ഒരു പ്രോഗ്രാമര്‍  മസാഷുസെറ്റ്സ് കോടതിയുടെയും നിയമവ്യവസ്ഥയുടെ പീഡനവും മൂലം  ആത്മഹത്യക്ക് പാത്രമാകുന്നതു് എന്ന കാര്യം  കൂടി ഇതിനോടു് കൂട്ടി വായിക്കേണ്ടിയിരിക്കുന്നു. നാസയുടെ സൈറ്റ് ഹാക്ക്ചെയ്യാന്‍ ശ്രമിച്ചു  കേസില്‍ കുറ്റാരോപിതനായ ജൊനാഥന്‍ ജയിംസ് എന്ന 24കാരന്‍ 2008 മെയ്‌‌മാസത്തില്‍ സ്വയം  വെടിവച്ചു് മരണം  വരിച്ചിരുന്നു. ആത്മഹത്യാക്കുറിപ്പില്‍ അവന്‍ എഴുതി “എനിക്കിവിടുത്തെ നിയമവ്യവസ്ഥയില്‍ വിശ്വാസമില്ല. ഒരുപക്ഷേ എന്റെ ഇന്നത്തെ പ്രവര്‍ത്തികള്‍, ഒപ്പം  ഈ കത്തും സമൂഹത്തിനു് ശക്തമായ ഒരു സന്ദേശം  നല്കും.”

പകര്‍പ്പവകാശം  എന്ന അറുപഴഞ്ചന്‍ വ്യവസ്ഥയെക്കുറിച്ചുള്ള വീണ്ടുവിചാരത്തിനായി ആരോണ്‍ ബലിയാടായതാകാം. എന്തായാലും  പലരുടേയും  മനസ്സില്‍ ഒരിത്തിരി നീറ്റലും  അതിലുപരി പുനര്‍ചിന്തയുടെ ഒരേടും  വിതയ്ക്കാന്‍ അരോണിനായി. ആരോണിന്റെ വിക്കിപീഡിയ ഉപയോക്തൃസംവാദ  താളില്‍ നിത്യേന വരുന്ന അനുശോചനങ്ങളും  പല ചത്വരങ്ങളിലും  കൂടുന്ന അനുശോചന സമ്മേളനങ്ങളും, ബ്ലോഗ്‌‌പോസ്റ്റുകളും  ആരോണിലെ അഗ്നി  ഏറ്റുവാങ്ങുന്നതിനായി സമൂഹം തയ്യാറായതായി ഉറപ്പുനല്കുന്നു.  ആരോണ്‍ അനുസ്മരണ പോസ്റ്റുകളും അതിനായി തയ്യാറാക്കിയ #PDFTribute എന്ന ടാഗും സാമൂഹ്യക്കൂട്ടായ്മാ സൈറ്റുകളില്‍ നിറഞ്ഞു നിന്നു. ആരോണിന്റെ അറസ്റ്റിനോട് പ്രതിഷേധിച്ച് ജസ്റ്റര്‍ കൈവശം  വച്ചിരുന്ന ഫിലോസഫിക്കല്‍ സൊസൈറ്റിയുടെ 33 ജീ.ബി. ടൊറന്റ്‌‌ ഗ്രെഗ് മാക്സ്‌‌വെല്‍ എന്നയാള്‍ പുറത്തുവിട്ടു.  ആരോണിന്റെ ആത്മഹത്യയ്ക്ക് ഏതാനം  ദിവസം  മുന്‍പ് ജസ്റ്റര്‍ തങ്ങളുടെ കുറച്ച് പ്രബന്ധങ്ങള്‍ എല്ലാവര്‍ക്കുമായി തുറന്നു കൊടുത്തു.   ഒരു ആത്മഹത്യാക്കുറിപ്പു പോലും  എഴുതിവച്ചില്ലെങ്കിലും  ആരോണ്‍ എന്ന ഓണ്‍ലൈന്‍ ഗറില്ലാപോരാളിയുടെ അവസാന ഇംഗിതങ്ങളറിയുന്നതിനും അതുപ്രകാരം പ്രവര്‍ത്തിക്കുന്നതിനും  ജനത സജ്ജരായിരിക്കുന്നു എന്നു വേണം  മനസ്സിലാക്കാന്‍. അനോണിമസിന്റെ ഓപ്പറേഷന്‍ ഏഞ്ചല്‍ പ്രവര്‍ത്തങ്ങളും,വിജയം  കണ്ടില്ലെങ്കിലും  മരണത്തിനുത്തരവാദികളായ നിയമജ്ഞരെ തത്‌‌സ്ഥാനത്തു നിന്നും  പൂറത്താകാന്‍ നടത്തിയ പ്രവര്‍ത്തനങ്ങളും ഇതിനു തെളിവാണു്.

ആരോണിനൊപ്പം ഭരണകൂടത്തിനും  സമൂഹത്തിനും നടക്കാനാകാഞ്ഞതാകാം ആ ചെറുപ്പക്കാരനെ നമുക്ക് നഷ്ടമാക്കിയതു്. സ്വയം  ‘അപ്ലൈഡ് സോഷ്യോളജിസ്റ്റ്’ എന്ന് വിളിച്ചിരുന്ന അവന്‍, സാമൂഹ്യവ്യവസ്ഥകളെ ഹാക്ക് ചെയ്യുന്നതില്‍ ആനന്ദം  കണ്ടെത്തി. മെച്ചപ്പെട്ട ഒരു നാളെ സ്വപ്നം  കണ്ടു, അതിനായി പ്രവര്‍ത്തിച്ചു. ഒരു പക്ഷേ  അതായിരിക്കാം  ആരോണ്‍ ചെയ്ത തെറ്റ്..

ഭൂഗോളത്തെയാകെ കൈപ്പിടിയിലൊതുക്കി ഓപ്പൺസ്ട്രീറ്റ്‌മാപ്പ്

2012 ജൂൺ 27നു മലയാളത്തിനായി എഴുതിയതു്. അഭിപ്രായം/നിർദ്ദേശം അവിടെ ചേർക്കുക.

Image

പ്രപഞ്ചം എന്നും മനുഷ്യനൊരു വിസ്മയമായിരുന്നു. ആ വിസ്മയം പതിയെ അധിനിവേശത്തിലേക്ക് കടന്നപ്പോൾ അവയെ രേഖപ്പെടുത്തേണ്ടത് അത്യാവശ്യമായിത്തീർന്നു. ക്രി. മു. 2300 മുതൽ തന്നെ ഗ്രീസിൽ കളിമൺ ഫലകങ്ങളിൽ സ്ഥലങ്ങൾ അടയാളപ്പെടുത്തി വയ്ക്കുന്ന പ്രക്രിയ ആരംഭിച്ചിരുന്നു. ഇതോടെ അവരറിയാതെ തന്നെ ‘കാർട്ടോഗ്രഫി’ എന്നൊരു ശാഖയ്ക്ക് തുടക്കമിടുകയായിരുന്നു. അറിയപ്പെടുന്നതിൽ ഏറ്റവും പഴയ കാർട്ടോഗ്രാഫർ ടോളമിയാണ്. ഇന്നത്തെ ഭൂപടവിന്യാസം ഒത്തിരിയൊത്തിരി വളർന്ന് ഡിജിറ്റൽവത്കരണത്തിന്റെ പരമാവധിയെത്തി ഇനിയെങ്ങോട്ടെന്നറിയാതെ മിഴിച്ച് നിൽക്കുകയാണ്. ഗൂഗിൾ മാപ്പ്സ് അധിനിവേശം പുലർത്തുന്ന ഓൺലൈൻ മാപ്പിങ്ങ് മേഖലയിൽ യാഹൂ, ബിങ്ങ്, നോക്കിയ ഓ.വി.ഐ എന്നിവയ്ക്കും തുച്ഛമെങ്കിലും  ഒഴിവാക്കാൻ കഴിയാത്ത ഓഹരിയുണ്ട്. ടെറസ്ട്രിയൽ ഭൂപടരംഗത്ത് ഗൂഗിൾ എർത്ത്, വിക്കിമാപ്പിയ എന്നിവയ്ക്കൊപ്പം ഒരു കൈ നോക്കാൻ ഇന്ത്യയുടെ സ്വന്തം ഭുവനുമുണ്ട്

ഇനി പറയാൻ പോകുന്ന വ്യക്തി ഇതുവരെ പറഞ്ഞവരിൽ നിന്നും ഒരല്പം വ്യത്യസ്തനാണ്. അധികമാരും തിരിച്ചറിയാത്ത ഈ വ്യത്യസ്തത തന്നെയാണ് അദ്ദേഹത്തിന്റെ ബലവും –  ഓപ്പൺസ്ട്രീറ്റ്‌മാപ്പ് അഥവാ ഓ. എസ്. എം ( http://openstreetmap.org/ ) എന്ന വിക്കിസോഫ്റ്റ്‌വെയർ അടിസ്ഥാനമാക്കി പ്രവർത്തിക്കുന്ന ഓൺ‌ലൈൻ സ്വതന്ത്ര മാപ്പിങ്ങ് സൈറ്റാണ് കഥാതന്തു. വിക്കിപീഡിയയെപ്പോലെ ഉപയോക്താക്കളിൽ നിന്നുമുള്ള വിവരങ്ങളെ അടിസ്ഥാനമാക്കിയാണ് ഓപ്പൺസ്ട്രീറ്റ്‌മാപ്പും പ്രവർത്തിക്കുന്നത്. കോളാബറേറ്റീവ് മാപ്പിങ്ങ് എന്നറിയപ്പെടുന്ന ഈ മാപ്പിങ്ങ് രീതി ഗൂഗിൾ മാപ്പ്സടക്കം ഒട്ടനവധി സൈറ്റുകൾ ഉപയോഗിക്കുന്നുണ്ടെങ്കിലും ഇരു വശത്തേക്കുമുള്ള ഡേറ്റയുടെ ഒഴുക്ക് (ഉപയോക്താക്കൾക്ക് ഓപ്പൺസ്ട്രീറ്റ്‌മാപ്പിലേക്ക് വിവരങ്ങൾ അപ്ലോഡാനും, വിവരങ്ങൾ ഡൗൺലോഡ് ചെയ്ത് എന്താവശ്യത്തിനുമായി ഉപയോഗിക്കുവാനുമുള്ള സൗകര്യം) ഓപ്പൺസ്ട്രീറ്റ്‌മാപ്പിനെ വ്യത്യസ്ഥമാക്കുന്നു. ഒരു വിക്കി സോഫ്റ്റ്‌വെയറിനെ അടിസ്ഥാനമാക്കി പ്രവർത്തിക്കുന്നതിനാൽ ഇതിലെ ഉള്ളടക്കം ആർക്കും തിരുത്താൻ സാധിക്കുന്നു. മാത്രമല്ല മാറ്റങ്ങളെല്ലാം സമയാനുഗതമായി സൂക്ഷിക്കുന്നതിനാൽ ഏതൊരു സമയത്ത് നിലനിന്ന സ്ഥിതിയിലേക്ക് വേണമെങ്കിലും മുൻപ്രാപനം ചെയ്യാവുന്നതുമാണ്.

Image

ഭൂമിശാസ്ത്രവിവരങ്ങൾ (ജിയോഡേറ്റ) ലോകത്തിൽ പലയിടത്തും സ്വതന്ത്രമല്ല. ഗൂഗിൾ മാപ്പ്‌സ് പോലെയുള്ള ഒട്ടുമിക്ക സൈറ്റുകളിലേയും ഉള്ളടക്കം പകർപ്പവകാശസംരക്ഷിതമാണ്. അത് മിക്കപ്പോഴും ഗൂഗിൾ, നാവ്‌ടെക്, ടെലിഅറ്റ്ലസ് എന്നീ മാപ്പിങ്ങ് കമ്പനികൾക്കോ ഓർഡിനൻസ് സർവ്വേ പോലുള്ള  മാപ്പിങ്ങ് ഏജൻസികൾക്കോ അവകാശപ്പെട്ടതായിരിക്കും. അവർ ഈ വിവരം നിർമ്മിക്കാൻ ഭാരിച്ച ചിലവ് വഹിച്ചതിനാൽ സ്വതേ ഈ ഉള്ളടക്കം പകർപ്പവകാശത്തിനാൽ സംരക്ഷിച്ചിരിക്കും. ഇത് പുനരുപയോഗിക്കാൻ നമ്മൾ ഗൂഗിളിനും മറ്റും പണം നൽകണമെന്നു മാത്രമല്ല, അവർ മുൻപോട്ട് വയ്‌ക്കുന്ന ഒട്ടനവധി നിബന്ധനകൾ അംഗീകരിക്കേണ്ടതായും വരും. ഇവിടെയാണ് ഓപ്പൺസ്ട്രീറ്റ്‌മാപ്പ് താരമാകുന്നത്. ഉള്ളടക്കമെല്ലാം ക്രിയേറ്റീവ് കോമൺസ് ആട്രിബ്യൂഷൻ ഷെയർ എലൈക്ക് 2.0 (CC-BY-SA 2.0) പ്രകാരമാണ്. അതിനാൽ കടപ്പാട് നൽകിക്കൊണ്ട് ഏതുവിധേനയുള്ള പുനരുപയോഗത്തിനും ഓപ്പൺസ്ട്രീറ്റ്‌മാപ്പ് വേദിയൊരുക്കുന്നു.

വിക്കിപീഡിയയിൽ നിന്നും പ്രചോദനമുൾക്കൊണ്ട് 2004 ജൂലൈയിലാണ് സ്റ്റീഫൻ കോസ്റ്റ് ഓപ്പൺസ്ട്രീറ്റ്‌മാപ്പ് രൂപീകരിച്ചത്. ഏതൊരു സ്വതന്ത്രസോഫ്‌റ്റ്‌വെയർ കൂട്ടായ്മയേയും പോലെ 2006ൽ ഓപ്പൺസ്ട്രീറ്റ്മാപ്പിന്റെ പ്രചാരണത്തിനും പരിചരണത്തിനും പുരോഗതിക്കന്മായി ഓപ്പൺസ്ട്രീറ്റ്‌മാപ്പ് ഫൗണ്ടേഷൻ രൂപീകരിച്ചു. ലാഭേച്ഛയില്ലാതെ പ്രവർത്തിക്കുന്ന ഈ സ്ഥാപനം സംഭാവനകളിലൂടെയും അംഗങ്ങളിൽ നിന്നുള്ള തുകയിലൂടെയുമാണ് മുന്നോട്ട് പോകുന്നത്. പിന്നീട് കോസ്റ്റ് തന്നെ ക്ലൗഡ്മേഡ് എന്ന പേരിൽ ഓപ്പൺസ്ട്രീറ്റ്‌മാപ്പ് അടിസ്ഥാനമാക്കി വെബ്സൈറ്റുകൾക്ക് ആപ്ലിക്കേഷൻ പ്രോഗ്രാമിങ്ങ് ഇന്റർഫേസ് നിർമ്മിക്കുന്ന ഒരു സ്ഥാപനത്തിന് തുടക്കമിട്ടു. 2006ൽ തങ്ങളുടെ ഏരിയൽ മാപ്സിന്റെ പിന്നാമ്പുറത്ത് ഓപ്പൺസ്ട്രീറ്റ്‌മാപ്പാകും ഉപയോഗിക്കുക എന്ന് യാഹു പ്രഖ്യാപിച്ചതോടെയാണ് ഓപ്പൺസ്ട്രീറ്റ്മാപ്പിന് ഇന്നു കാണുന്ന പ്രശസ്തി ലഭിച്ചു തുടങ്ങിയത്. 2007ഓടെ ഓക്സ്ഫോർഡ് സർവ്വകലാശാല തങ്ങളുടെ വെ‌ബസൈറ്റിൽ ഓ.എസ്.എം ഡേറ്റ ഉപയോഗിച്ചു തുടങ്ങി. അതേ വർഷം ജൂലൈയിൽ നടന്ന ‘എ സ്റ്റേറ്റ് ഓഫ് മാപ്സ്’ എന്ന ഓപ്പൺസ്ട്രീറ്റ്മാപ്സ് ഉപയോക്താക്കളുടെ സംഗമത്തിൽ 9000ലധികം പേർ പങ്കെടുത്തു. ഗൂഗിൾ, യാഹൂ, മാഞ്ചസ്റ്റർ സർവ്വകലാശാല മുതലായവരായിരുന്നു ഇതിന്റെ പ്രായോജകർ. ഇതിനകം ഏതാണ്ട് 5 ലക്ഷത്തിലധികം സന്നദ്ധപ്രവർത്തകർ ഓപ്പൺസ്ട്രീറ്റ്മാപ്പിൽ അംഗത്വമെടുത്തു കഴിഞ്ഞു. ഇവരുടെ ശ്രമഫലമായി 267 കോടിയിലധികം പോയിന്റുകൾ സൈറ്റിലെത്തിയിട്ടുണ്ട്.

Imageഓരോ തലത്തിനേയും വ്യത്യസ്ഥ മാപ്പ്‌ടൈലുകളായി വിഭജിച്ചാണ് ഓപ്പൺസ്ട്രീറ്റ്മാപ്പ് പ്രവർത്തിക്കുന്നത്. ഒന്നാമത്തെ സൂം തലത്തിൽ ഒറ്റ മാപ്പ്‌ടൈലിൽ തന്നെ ഭൂമിയുടെ പ്രതലമാകെ ഉൾകൊള്ളിച്ചിരിക്കും, അടുത്ത സൂം തലത്തിൽ ഇത് നാലായി മാറുന്നു. പിന്നീട് 16 എന്നിങ്ങനെ ആയിരക്കണക്കിന് മാപ്പ്ടൈലുകളിലേക്ക് വളരുന്നു. ഓരോ തലത്തിലുമുള്ള മാപ്പ്‌ടൈലിനുമായി വ്യത്യസ്ഥ വിവരങ്ങളാണ് സൂക്ഷിച്ചു വച്ചിരിക്കുക. ഈ  ഉള്ളടക്കത്തെ പി.ഡി.എഫ്, ജെപെഗ് മുതലായ ഒട്ടനവധി ഫോർമാറ്റുകളിൽ ഡൗൺലോഡ് ചെയ്യാനുള്ള  അവസരവും ഓ. എസ്. എം. ഒരുക്കുന്നുണ്ട്.

ഫോണുകൾ പോലെയുള്ള ജി. പി. എസ് സംവിധാനമുള്ള ഗാഡ്ജറ്റുകൾ സർവ്വസാധാരണമായ ഇക്കാലത്ത് ജി. പി. എക്സ് (ജി. പി. എസ് എക്സ്ചേഞ്ച്) ഫോർമാറ്റിലുള്ള ഉള്ളടക്കം ഓപ്പൺസ്ട്രീറ്റ്മാപ്പിലേക്ക് അപ്ലോഡാവുന്നതാണ്.  സ്ഥലം, ഉയരം, സമയം എന്നിവയടങ്ങുന്ന ടാഗോടു കൂടിയ ബിന്ദുക്കലുടെ ശൃംഖലയാണ് ഇതിലൂടെ നിർമ്മിക്കപ്പെടുന്നത്. ശേഷം വേ-പോയിന്റുകൾ, റൂട്ടുകൾ, പാലങ്ങൾ, റയിൽപ്പാതകൾ മുതലായവ നിർവ്വചിക്കാൻ കഴിയും. ഇതിനായി ഓൺലൈൻ എഡിറ്ററായ Potlatch, ഓഫ്‌ലൈൻ എഡിറ്ററായ JOSM  എന്നിവ ഉപയോഗിക്കാം. കൂടുതൽ എഡിറ്ററുകൾ http://wiki.openstreetmap.org/wiki/Editing എന്ന കണ്ണിയിൽ കാണാം.

ഒരു ജി.പി.എക്സ് ട്രാക്ക് അപ്ലോഡാനായി ലോഗിൻ ചെയ്ത ശേഷം, (അംഗത്വമില്ലാത്തവർക്ക് ട്രാക്ക് അപ്ലോഡാൻ സാധ്യമല്ല)  മുകളിലായി കാണുന്ന ‘ജി.പി.എസ്. ട്രേസസ്’ എന്ന ടാബിൽ അമർത്തുക. ശേഷം വരുന്ന താളിൽ നിന്നും ‘അപ്ലോഡ് എ ട്രേസ്’ എന്ന കണ്ണിയിൽ അമർത്തി ഫയൽ ബ്രൗസ് ചെയ്ത് നൽകുക. വിവരണവും ടാഗും നൽകിയ ശേഷം ദൃശ്യത തിരഞ്ഞെടുത്ത് ഫയൽ അപ്ലോഡുക. ഡേറ്റ വിസിബിലിറ്റി പബ്ലിക്കായാൽ മാത്രമേ ട്രേസ് അപ്ലോഡാൻ സാധിക്കുകയുള്ളൂ. ടാഗിങ്ങിലൂടെ ഒരേപേരിലുള്ള ട്രേസുകളെ ഒരുമിച്ച് അടുക്കിസൂക്ഷിക്കാൻ സഹായിക്കും. ഉദാഹരണത്തിന് ‘Kollam’ എന്ന് നൽകുമ്പോൾ അതേ ടാഗിലുള്ള എല്ലാ ട്രേസുകളും കണ്ടെത്താൻ സാധിക്കും. നിലവിൽ ടാഗുകൾ കേസ് സെൻസിറ്റീവാണ്. അതായത് Kottayam, kottayam എന്നിവയെ രണ്ട് ടാഗായി പരിഗണിക്കും.

Image
നിലവിലെ ഉള്ളടക്കം ക്രിയേറ്റീവ് കോമൺസ് അനുമതിയിലാണെങ്കിലും ഡേറ്റ കൈകാര്യം ചെയ്യുമ്പോൾ പ്രസ്തുത ലൈസൺസ് വരുത്തുന്ന ചില വീഴ്ച്ചകൾ മൂലം ഓപ്പൺസ്ട്രീറ്റ്മാപ്പിന്റെ ഉള്ളടക്കത്തെ ഓപ്പൺ ഡേറ്റാബേസ് ലൈസൺസിലേക്ക്  മാറ്റാനുള്ള ശ്രമത്തിലാണ് അണിയറപ്രവർത്തകർ. നിലവിലുള്ള അംഗങ്ങളോട് ഇതിനകം അപ്ലോഡിയ ഡേറ്റകളെ ഓപ്പൺഡേറ്റാബേസ് അനുമതിയിലേക്ക് മാറ്റാൻ സൈറ്റ് നിർദ്ദേശിച്ചിട്ടുണ്ട്. ഇതിനെ തിരസ്കരിക്കുന്നവരുടെ ഉള്ളടക്കം നീക്കം ചെയ്തുകൊണ്ടിരിക്കുകയാണ്..

കമ്പ്യൂട്ടറിനും ഫോണുകൾക്കുമായി ഒട്ടനവധി ഓപ്പൺസ്ട്രീറ്റ്മാപ്പ് തേഡ് പാർട്ടി സോഫ്റ്റ്‌വെയറുകൾ ലഭ്യമാണ്. ഒപ്പം വിക്കിപീഡിയ, വേഡ്പ്രസ് എന്നിവയോടു സമന്വയിച്ച് പ്രവർത്തിക്കാനുള്ള ശേഷിയും ഓപ്പൺസ്ട്രീറ്റ് മാപ്പിനെ മികച്ചതാക്കുന്നു. എന്നിരുന്നാലും ഗൂഗിൾ മാപ്പ്സിന് പകരം വയ്ക്കാനൊരാളായോ എന്ന ചോദ്യം ഉന്നയിക്കുമ്പോൾ ഒരല്പം നിരാശയോടെ തലകുനിക്കേണ്ടി വരും. അങ്ങനെയൊരു നാളെ വരട്ടെയെന്ന ആശംസയോടെ നിർത്തുന്നു.

ഡെബിയൻ ഗ്നു/ലിനക്സ് ഇൻസ്റ്റാളേഷൻ

പ്രമുഖ ഗ്നു/ലിനക്സ് വിതരണമായ ഡെബിയന്റെ നിലവിലെ സ്ഥിരതയുള്ള പതിപ്പായ വീസിയുടെ സന്നിവേശനം (ഇൻസ്റ്റാളേഷൻ)

Image

1) ഡെബിയൻ വീസിയുടെ ഐ.എസ്.ഓ. ഡൗൺലോഡ് ചെയ്യുക.

ഡെബിയൻ വീസിയുടെ ഐ.എസ്.ഓ. ഇവിടെ നിന്നും ഡൗൺലോഡ് ചെയ്യുക. ഇത് ഒരു സി.ഡി.യിലേക്കു റൈറ്റ് ചെയ്യുന്നതാവും നല്ലത്. (പിന്നീടുള്ള ഉപയോഗങ്ങൾക്ക് ഉപകരിക്കും) അല്ലെങ്കിൽ ഒരു പെൻഡ്രൈവിലോ മറ്റോ ബൂട്ടബിൾ തയ്യാറാക്കിയാലും മതി. സി.ഡി. ഡ്രൈവിൽ ഇട്ട ശേഷം റീസ്റ്റാർട്ട് ചെയ്ത് പ്രസ്തുത ഡ്രൈവ് തിരഞ്ഞെടുക്കുക. (ഇന്റലിനു F12 ആയിരിക്കും)

2) ഇൻസ്റ്റാളേഷൻ ആരംഭിക്കുക

അൽപ സമയത്തിനു ശേഷം ഇൻസ്റ്റാളേഷൻ മെനു പ്രത്യക്ഷപ്പെടും. ഇവിടെ നിന്നും ‘Install’ തിരഞ്ഞെടുത്ത് എന്റർ അമർത്തുക.

Image

3) ഭാഷ തിരഞ്ഞെടുക്കൽ

ഇൻസ്റ്റാളേഷനു വേണ്ട ഭാഷ തിരഞ്ഞെടുക്കുകയാണു അടുത്ത പടിയിൽ. ഇതു തന്നെയാകും ഇൻസ്റ്റാൾ ചെയ്ത സിസ്റ്റത്തിന്റെയും സ്വതേയുള്ള ഭാഷ.

Image

4) പ്രദേശം തിരഞ്ഞെടുക്കുക

അടുത്തതായി നിങ്ങളുടെ പ്രദേശം തിരഞ്ഞെടുക്കുക. ഇതനുസരിച്ചാണു സിസ്റ്റത്തിന്റെ ലോക്കലെ (പ്രദേശം, നാണയവ്യവസ്ഥ, സമയം ) ക്രമീകരിക്കുക. തന്നിട്ടുള്ളവയിൽ ലോക്കലെ ഇല്ലെങ്കിൽ ‘Other’ തിരഞ്ഞെടുക്കാം. Image

ImageImage

5) ലോക്കലെ കോൺഫിഗറേഷൻ

പ്രദേശത്തിനായി ഒരു ലോക്കലെ കോൺഫിഗർ ചെയ്തിട്ടില്ലെങ്കിൽ അതിനുള്ള ഉപാധിയാണു അടുത്ത പടിയിൽ.

Image

6) കീബോർഡ് കോൺഫിഗറേഷൻ

ഉപയോഗിക്കേണ്ട കീബോർഡിനുള്ള കോൺഫിഗറേഷൻ അടുത്ത പടിയിൽ തിരഞ്ഞെടുക്കുക.

Image

7) അഡീഷണൽ ഘടകങ്ങളുടെ സ്ഥാപനം

സിസ്റ്റത്തിനാവശ്യമുള്ള ഘടകങ്ങൾ അതു ശേഖരിക്കുന്നു.

Image

8) ഹോസ്റ്റ് നാമം

സിസ്റ്റം ഒരു ശൃംഖലയിലുൾപ്പെട്ടിരിക്കുന്നതാണെങ്കിൽ അതിനു നൽകിയിട്ടുള്ള ഹോസ്റ്റ് നാമമാണു ഇവിടെ നൽകേണ്ടത്. അങ്ങനെയല്ലെങ്കിൽ എന്റെങ്കിലും നൽകിയാൽ മതി.

Image

9) ഡൊമൈൻ നാമം

ശൃംഖലാ ക്രമീകരണത്തിന്റെ അടുത്ത ഭാഗമാണിത്. സിസ്റ്റത്തിന്റെ ശൃംഖലാ ഡൊമൈൻ നാമം ഇവിടെ നൽകുക.

Image

10) റൂട്ട് ക്രമീകരണം.

ഒരു സിസ്റ്റത്തിന്റെ കാര്യനിർവ്വാഹകനാണു് റൂട്ട്. സിസ്റ്റത്തിൽ സർവ്വ വിധ അധികാരവുമുള്ള ഇദ്ദേഹത്തിനു യഥാക്രമം ശക്തമായ ഒരു പാസ്‌വേഡ് നൽകി ക്രമീകരിക്കുക. ഈ പാസ്‌വേഡ് ഒരിക്കലും മറന്നു പോകരുത്. ഒപ്പം അവശ്യത്തിനു ദൃഢവുമാകാൻ ശ്രദ്ധിക്കുക. ഇതു തന്നെ സ്ഥിരീകരിക്കുൻ അടുത്ത പടിയിൽ ഒന്നു കൂടി നൽകുക.Image

Image

11) ഉപയോക്തൃ അക്കൗണ്ട് ക്രമീകരണം

റൂട്ട് അക്കൗണ്ട് അല്ലാതെയുള്ള ഉപയോക്തൃ അക്കൗണ്ട് ഈ ഘട്ടങ്ങളിൽ ക്രമീകരിക്കാം. ഉപയോക്താവിന്റെ യഥാർത്ഥനാമം, ഉപയോക്തൃനാമം, രഹസ്യവാക്ക് എന്നിവ തുടർന്നുള്ള പടികളിൽ നൽകുക.

Image

Image

Image

Image

12) കൂടുതൽ ക്രമീകരണങ്ങൾ

തുടർന്നുള്ള ഇൻസ്റ്റാളേഷൻ ഘട്ടങ്ങൾ സ്വതേ ചില ക്രമീകരണങ്ങൾ നടത്തും. ഉപയോക്താവിന്റെ ഇടപെടൽ ഇവിടെ ആവശ്യമില്ല.

Image

13) ഡിസ്ക് പാർട്ടീഷനിങ്ങ്

ഒരു പക്ഷേ ഇൻസ്റ്റാളേഷനിലെ ഏറ്റവും കുഴപ്പം പിടിച്ച ഭാഗം ഇതായിരിക്കും. യഥാവിധി അല്ല ഈ ഭാഗം ചെയ്യുന്നതെങ്കിൽ സിസ്റ്റത്തിൽ നിലവിലുള്ള എല്ലാം നഷ്ടപ്പെട്ടേക്കാം. മറ്റൊരു ഇൻസ്റ്റാളേഷനുമില്ല, ഡെബിയൻ ഡിസ്ക് മുഴുവനായും ഇൻസ്റ്റാളേഷനു വേണ്ടി ഉപയോഗിക്കുകയാണെങ്കിൽ ആദ്യ മൂന്നെണ്ണത്തിൽ അനുയോജ്യമായ ഒരെണ്ണം തിരഞ്ഞെടുക്കാം. മറിച്ച് പ്രത്യേകം പാർട്ടീഷൻ നിർമ്മിക്കണമെങ്കിലോ, മറ്റൊരു ഓപറേറ്റിങ്ങ് സിസ്റ്റത്തിനൊപ്പമോ ഇൻസ്റ്റാളേഷൻ നടത്തണമെങ്കിൽ ‘Manual’ എന്ന ഭാഗം തിരഞ്ഞെടുക്കുക. കൂടുതലറിയാൻ: ഇത് / ഇത് കാണുക.

Image

ഇൻസ്റ്റാൾ ചെയ്യേണ്ട പാർട്ടീഷൻ തിരഞ്ഞെടുക്കുക.

Image

വിവിധ ഫയൽസിസ്റ്റം ഡയറക്ടറികൾ വേണമെങ്കിൽ അതിവിടെ നിർദ്ദേശിക്കാം. (കൊടുക്കണമെന്നു നിർബന്ധമില്ല)

Image

പാർട്ടീഷനിങ്ങ് പൂർത്തിയായെങ്കിൽ അവ ഡിസ്കിലേക്ക് എഴുതാനാരംഭിക്കാം. (റെയ്ഡ്, വോള്യം മാനേജർ മുതലായവ ക്രമീകരിക്കണമെങ്കിൽ ഈ ഘട്ടത്തിലാകാവുന്നതാണു്)

Image

Image

14) ബേസ് സിസ്റ്റം ഇൻസ്റ്റോളേഷൻ

തുടർന്നു ബേസ് സിസ്റ്റം ഇൻസ്റ്റാൾ ചെയ്യാൻ ആരംഭിക്കും.

Image

15) പാക്കേജ് നിയന്ത്രണം

ആപ്റ്റ് (apt) മുഖാന്തരം പാക്കേജ് ഡൗൺലോഡ് ചെയ്യേണ്ട മിറർ സൈറ്റു തിരഞ്ഞെടുക്കുകയാണു തുടർന്ന്. ആദ്യം സ്വന്തം രാജ്യവും (ഇല്ലെങ്കിൽ ഏറ്റവും അടുത്തുള്ള രാജ്യം) ഒരു മിററും തിരഞ്ഞെടുക്കുക.

Image

Image

ഒരു പ്രോക്സി സെർവ്വർ മുഖാന്തരമാണു ഇന്റർനെറ്റ് ബന്ധം സാധ്യമാക്കിയിരിക്കുന്നതെങ്കിൽ അതിന്റെ വിവരമാണു ഇവിടെ നൽകേണ്ടത്. പ്രോക്സി ഇല്ലെങ്കിൽ അടുത്ത ഘട്ടത്തിലേക്കു തുടരാം.

Image

apt ക്രമീകരിക്കുകയും അതിനാവശ്യമായ ഫയലുകൾ നവീകരിക്കുകയുമാണു അടുത്ത പടിയിൽ (apt-get updateനു തുല്യം) ഇതിനൽപം സമയം ആവശ്യമായി വന്നേക്കാം)

Image

ഉപയോക്താക്കൾ ഏറ്റവുമധികം ഉപയോഗിക്കുന്ന പാക്കേജുകളാണു് ഡെബിയന്റെ ആദ്യ സിഡിയിൽ ഉൾപ്പെടുത്തുന്നത്. ഇതു തിരഞ്ഞെടുക്കുന്നതിനായി ഉപയോക്താക്കൾക്കിടയിൽ ഒരു സർവ്വേ നടത്താറുണ്ട്. ഇതിൽ ഭാഗാവാക്കാകാൻ ആഗ്രഹിക്കുന്നെങ്കിൽ ‘Yes’ അല്ലെങ്കിൽ .No’ തിരഞ്ഞെടുക്കുക.

Image

Image

16) പ്രോഗ്രാമുകളുടെ ഇൻസ്റ്റാളേഷൻ

ഓരോ ഉപയോക്താക്കളുടേയും താത്പര്യമനുസരിച്ച് ഇൻസ്റ്റാൾ ചെയ്യപ്പെടേണ്ട പ്രോഗ്രാമുകൾ ഇവിടെ തിരഞ്ഞെടുക്കാം. തുടർന്ന് അവ (ലൈബ്രറികളടക്കം) ഇൻസ്റ്റാൾ ചെയ്യപ്പെടുന്നു.

Image

Image

Image

17) ബൂട്ട് ലോഡർ

ഒരു ഓപറേറ്റിങ്ങ് സിസ്റ്റത്തെ സെക്കന്ററി ഡിസ്കിൽ നിന്നും കണ്ടെത്തി പ്രൈമറി ഡിസ്കിലേക്ക് എത്തിക്കുന്ന പ്രോഗ്രാമാണു ബൂട്ട്സ്ട്രാപ് ലോഡർ അഥവാ ബുട്ട് ലോഡർ. പൊതുവേ ഗ്നു ലിനക്സ് വിതരണങ്ങളിൽ ഉപയോഗിക്കുന്ന ബുട്ട് ലോഡറാണു ഗ്രബ് ( Grand Unified Bootloader) ഇത് മാസ്റ്റർ ബൂട്ട് റെക്കോഡിലേക്ക് ഇൻസ്റ്റാൾ ചെയ്യുന്നതാണു അടുത്ത ഘട്ടം.

Image

Image

18) ഇൻസ്റ്റാളേഷൻ സമാപ്തം.

തുടർന്ന് ഇൻസ്റ്റാൾ ചെയ്യാനുപയോഗിച്ച മാധ്യമം നീക്കം ചെയ്യാം. ഇതോടെ പുതിയ ഇൻസ്റ്റാളേഷനിലേക്ക് സിസ്റ്റം റീബൂട്ട് ചെയ്യപ്പെടുന്നു.

Image

വിക്കിപാഠശാലയ്ക്കായി ലേഖനത്തിന്റെ ഒരു ചട്ടക്കൂട് തയ്യാറാക്കുന്നു.

ആൻഡ്രോയ്ഡിനായി എം. എൽ. ബ്രൗസർ

2012 മെയ് 13ന് നാരായത്തിൽ (http://narayam.in) പ്രസിദ്ധീകരിച്ചത്. ആർക്കൈവിങ്ങിനായി മാത്രം ഇവിടെ ചേർക്കുന്നു. സംശയം/അഭിപ്രായം അവിടെ ചേർക്കുക

 

Logo of ML Browserഓപ്പറ മിനി മുഖാന്തരം മലയാളം വായിക്കുന്ന വിധം തൊട്ട് മുൻപിലത്തെ പോസ്റ്റിൽ വായിച്ചല്ലോ.  ഡേറ്റാ ഉപഭോഗം ലഘൂകരിക്കുക എന്ന ലക്ഷ്യം മുൻ നിർത്തിയാണ് ഓപ്പറ മിനിയിൽ പ്രധാനമായും പ്രോക്സി സെർവ്വറുകൾ ഉപയോഗിക്കുന്നത്. എന്നാൽ ഉപയോക്താക്കളുടെ പല സ്വകാര്യ വിവരങ്ങളും (ഉദാ: പാസ്‌വേഡ്) ഇതു വഴി കടന്നു പോകുന്നത് അത് നല്ല നടപടിയല്ല. ഇവ വേണമെങ്കിൽ അവർക്ക് സൂക്ഷിച്ചു വയ്ക്കമെന്നത് സുരക്ഷിതത്വത്തിനു ചെറിയ കോട്ടം സംഭവിപ്പിക്കുന്നു. ഇതോടൊപ്പം ഓപ്പറ മിനി ജാവാ സ്ക്രിപ്റ്റ് പിന്തൂണയ്ക്കാത്തത് ഉപയോക്താക്കൾക്ക് പലയിടത്തും ബുദ്ധിമുട്ടായി അനുഭവപ്പെടും.(ഉദാ: ഫോർ ഷെയേർഡിൽ നിന്നും ഡൗൺലോഡ് ചെയ്യുമ്പോൾ.) ഓപ്പറ മിനിയിലെ പ്രെസ്റ്റോ അധിഷ്ഠിത ലേയൗട്ട് എഞ്ചിൻ ഇഷ്ടപ്പെടാത്ത ആൻഡ്രോയ്ഡ് ഉപയോക്താക്കൾക്ക് മുൻപിൽ പുതിയൊരു വാതായനം തുറക്കുകയാണ് ഈ പോസ്റ്റിലൂടെ.

Narayam Via ML Browserഗൂഗിൾ പ്ലേയിൽ ലഭ്യമായ ഈ വെബ് ഗമനോപാധിയുടെ പേര് എം. എൽ. – ബ്രൗസർ (ML-Browser) എന്നാണ്. വരമൊഴി ആൻഡ്രോയ്ഡ് പതിപ്പിലൂടെ നമുക്ക് പരിചിതനായ ജീസ്‌മോൻ ജേക്കബ് തന്നെയാണ് ഈ ബ്രൗസറും ഒരുക്കിയിരിക്കുന്നത്. ഓപ്പൺ സോഴ്സ് ബ്രൗസറായ സിർക്കോയുടെ (Zirco) സോഴ്സ് കോഡ് പ്രകാരം നിർമ്മിച്ചിരിക്കുന്ന ഈ ബ്രൗസറും മാതൃസോഫ്റ്റ്വെയറിനെപ്പോലെ ഗ്നു ജി.പി.എല്ലിലാണ് വിതരണം ചെയ്യപ്പെട്ടിരിക്കുന്നത്. ഇതോടൊപ്പം ഗ്രീൻ ഡ്രോയ്ഡ്, ഷാമാൻ എന്നീ പദ്ധതിയിലെ കോഡുകൾ കൂടി ഉൾക്കൊള്ളിച്ചിരിക്കുന്ന എം. എൽ. ബ്രൗസർ ഗൂഗിൾ പ്ലേയിൽ നിന്നും ഈ കണ്ണിയിലൂടെ ഡൗൺലോഡ് ചെയ്യാം. ഇതിന്റെ സോഴ്സ് കോഡ് ഇവിടെ ലഭ്യമാണ്. എൽ. ജി. ഫോണുകൾക്കായി പ്രത്യേകമായ ഫോണ്ട് ഫിക്സും ഉൾക്കൊള്ളിച്ചിരിക്കുന്ന ഈ ബ്രൗസറിന്റെ വലിപ്പം വളരെ തുച്ഛമാണെന്നൊരു (<400 കെ. ബി.) എന്നൊരു പ്രത്യേകതയുമുണ്ട്. സിസ്റ്റം പ്രോക്സി, ആഡ് ബ്ലോക്കർ, ജാവ സ്ക്രിപ്റ്റ് പിന്തുണ, യൂസർ ഏജന്റ് നിർവചനം, പ്ലഗ്ഗിൻ പിന്തുണ എന്നിവ എം. എൽ. ബ്രൗസറിന്റെ പ്രത്യേകതകളിൽ ചിലതാണ്.

 

സാങ്കേതികം :
Malayalam Wikipedia Via ML Browserഈ ബ്രൗസർ മലയാളം യുണീക്കോഡ് ഫോണ്ട് റെന്റർ ചെയ്യുന്നതിനായി പേജ് പൂർണ്ണമായും ലോഡ് ആയ ശേഷം അതിലേക്ക് സി. എസ്. എസ് (കാസ്കേഡിങ്ങ് സ്റ്റൈൽ ഷീറ്റ്) കോഡ് ഇൻജക്റ്റ് ചെയ്യുന്നു. റൺടൈമിലെ ഈ ഇൻജക്ഷനായി ജാവാസ്ക്രിപ്റ്റാണ് ഉപയോഗിക്കുന്നത്. അഞ്ജലി ഓൾഡ് ലിപിയുടെ പരിഷ്കൃതരൂപമാണ് ബ്രൗസറിലുപയോഗിച്ചിരിക്കുന്ന മലയാളം ഫോണ്ട്. ആൻഡ്രോയ്ഡ്, കോമ്പ്ലക്സ് ടെക്സ്റ്റ് ലേയൗട്ടിനെ പൂർണ്ണമായും പിന്തുണയ്ക്കാത്തതിനാൽ ഫോണ്ട് നവീകരിച്ച് കൂടുതൽ ഗ്ലിഫുകൾ സ്വകാര്യ ഉപയോക്തൃമേഖലയിൽ (Private User Area – PUA) ഉൾക്കൊള്ളിച്ചിട്ടുണ്ട്. ശരിയായ റെന്ററിങ്ങിനായി റൺടൈമിൽ ജാവാസ്ക്രിപ്റ്റ് ഇൻജക്റ്റ് ചെയ്യുന്ന ഫോണ്ട്, ചില അക്ഷരങ്ങളെയോ, അവയുടെ സന്ധികളേയോ സ്വകാര്യ ഉപയോക്തൃമേഖലയിൽ നിന്നുള്ള ഗ്ലിഫുകളുമായി റീമാപ്പ് ചെയ്യും. ഉപയോക്താക്കൾക്ക് ആപ്ലിക്കേഷൻ പ്രിഫറൻസ് മെനുവിലൂടെ ഇതിന് മാറ്റം വരുത്തുവാനോ ഇല്ലാതാക്കാനോ സാധിക്കുന്നതാണ്.

 

പ്രയോജനങ്ങൾ:

മലയാളം വായിക്കുവാനായി ഓപ്പറ മിനി ഉപയോഗിക്കുമ്പോഴുള്ള രണ്ട് പ്രശ്നത്തിനു ഇതു മൂലം പരിഹാരമുണ്ടായി – വാക്കുകൾ സെലക്ട് ചെയ്ത് കോപ്പി/പേസ്റ്റ് ചെയ്യാൻ സാധിക്കും, ഡേറ്റാ ഉപഭോഗത്തിനു അല്പം കുറവുണ്ട്. ചില ഫോണുകളിൽ മലയാളം മാപ്പ് ചെയ്യാൻ അല്പം താമസം  അനുഭവപ്പെടുന്നു എന്നത് മാത്രമാണ് ഇതുവരെ കണ്ട പ്രശ്നം.

 

പിൻകുറിപ്പ്:

എൽ. ജി.യിലും ചില ഐസ്‌ക്രീം സാൻഡ്‌വിച്ച് ഫോണുകളിലും മലയാളം അക്ഷരങ്ങൾക്കിടയിൽ ഒരു ഡാഷിട്ട വട്ടം അധികം കാണാൻ സാധ്യതയുണ്ട്.  ഇതൊഴിവാക്കാൻ Preferences-ൽ പോയി Malayalam Font fix എന്നിടത്ത് Alternate (LGModels) എന്നത് ചെക്ക് ചെയ്യുക.

സംശയം/അഭിപ്രായം ഇവിടെ നൽകുക

ഓപ്പറ മിനിയിലൂടെ മലയാളം

2011 മെയ്  26ന്  നാരായത്തിൽ (http://narayam.in) പ്രസിദ്ധീകരിച്ചത്. ആർക്കൈവിങ്ങിനായി മാത്രം ഇവിടെ ചേർക്കുന്നു. സംശയം/അഭിപ്രായം അവിടെ ചേർക്കുക

വളരെയധികം പ്രചരിച്ച ഒരു കുറുക്കുവിദ്യയാണെങ്കിലും പലരും സംശയമുന്നയിക്കുന്നതിനാൽ ഇതിനിപ്പോഴും പ്രസക്തിയുണ്ടെന്ന് കരുതുന്നു. എന്തായാലും ഇതിവിടെ കിടക്കട്ടെ ആർക്കെങ്കിലും പ്രയോജനപ്പെട്ടേക്കും..

മൊബൈൽ ഇന്റർനെറ്റ് ഉപയോക്താക്കൾ ഏറ്റവുമധികം ഉപയോഗിക്കുന്ന ഒരു വെബ് ഗമനോപാധി (ബ്രൗസർ) ആണ് ഓപ്പറ. ജാവ മൈക്രോ എഡിഷൻ, ആൻഡ്രോയ്ഡ്, വിൻഡോസ് മൊബൈൽ, ഐ ഓ.എസ്, ബാഡ, ബ്ലാക്ക്‌ബെറി, സിമ്പിയൻ എന്നിങ്ങനെ ഒട്ടുമിക്ക എല്ലാ തട്ടകങ്ങൾക്കു വേണ്ടിയും ഓപ്പറ മിനി ലഭ്യമാണ്. ഇപ്പോൾ ഓപ്പറ മിനിയുടെ നവീകരിച്ച പതിപ്പായ ഓപ്പറ മിനി നെക്സ്റ്റും ലഭ്യമാണ്.

മൊബൈൽ / ടാബ്‌ലറ്റുകൾക്ക് പ്രാദേശിക ഭാഷാ പിന്തുണയില്ലെങ്കിൽ മലയാളമടക്കമുള്ള അക്ഷരങ്ങൾ ചതുരക്കട്ടകളായായിരിക്കും ഓപ്പറയിൽ ദൃശ്യമാകുക. ഇതിനെ എങ്ങനെ മറികടക്കുമെന്ന് ചിന്തിക്കാം

  1. ആദ്യമായി ഓപ്പറ മിനി അല്ലെങ്കിൽ ഓപ്പറ മിനി നെക്സ്റ്റ് നിങ്ങളുടെ മൊബൈലിലേക്ക് ഡൗൺലോഡ് ചെയ്ത് സന്നിവേശിപ്പിക്കുക. (കണ്ണികൾ: ഗൂഗിൾ പ്ലേയിൽ , സിമ്പിയനു ഓ.വി.ഐ സ്റ്റോറിൽ , ആപ്പിൾ ഐ ട്യൂൺസിൽ, മറ്റ് ഫോണുകൾക്ക്, ഓപ്പറ മിനി നെക്സ്റ്റ് ഗൂഗിൾ പ്ലേയിൽ )

  2. നെറ്റ്‌വർക്ക് കണക്ഷൻ ഓണാക്കിയ ശേഷം (അവശ്യമുള്ളവയ്ക്ക്) അഡ്രസ് ബാറിൽ config: എന്ന് ടൈപ്പിയ ശേഷം ഓ. കെ. അമർത്തുക. (ഇതിനു പകരം about:configഎന്നോ opera:config എന്നോ നൽകിയാലും മതിയാകും.) ഇടയ്ക്കുള്ള ഭിത്തികകൾ (colon) ശ്രദ്ധിക്കുക.

    Malayalam in Opera Mini

  3. ഇപ്പോൾ തുറന്നു വരുന്ന താളിൽ കാണുക്ക ‘Use bitmap fonts for complex scripts‘ എന്ന എൻട്രി (സ്വതേ അവസാനമായിരിക്കും) ‘Yes‘ എന്ന് നൽകിയ ശേഷം ‘സേവ്‘ അമർത്തുക. ചിത്രം കാണൂ..

ഇത്രയും മതിയാകും. ഇനി മലയാളത്തിലുള്ള ഏതെങ്കിലും സൈറ്റിൽ പ്രവേശിച്ച് നോക്കൂ.. ഉദാ : http://ml.m.wikipedia.org

നിങ്ങൾക്ക് മലയാളം അനായാസം വായിക്കുവാൻ സാധിക്കുന്നുണ്ടാവും.

സാങ്കേതികം :

ഓപ്പറ മിനി മുഖാന്തരമുള്ള എല്ലാ ഡേറ്റാ വിനിമയവും അവരുടെ പ്രോക്സി സെർവ്വറുകളിൽക്കൂടിയായിരിക്കും, സാധാരണ ഗതിയിൽ അക്ഷരങ്ങളുടെ കോഡ് പോയിന്റുകൾ ഫോണിലേക്ക് പകർത്തിയ ശേഷം അവിടെയിട്ടായിരിക്കും റെന്റർ ചെയ്യുന്നത്. ഇതിനാലാണ് ഫോണിനു പിന്തുണയില്ലെങ്കിൽ അവ ദൃശ്യമാകാത്തത്. എന്നാൽ ഈ ഓപ്ഷൻ സജ്ജമാക്കുന്നതിലൂടെ സങ്കീർണ്ണമായ കോഡുകളെ അവരുടെ സെർവ്വറുകളിലിട്ടു തന്നെ റെന്റർ ചേയ്ത ശേഷം അവ ബിറ്റ്‌മാപ്പ് ചിത്രങ്ങളാക്കി ബ്രൗസറിലേക്ക് അയക്കുകയായിരിക്കും.. ചിത്രങ്ങൾ എല്ലാ ഫോണുകൾക്കും കോമ്പാറ്റബിൾ ആയിരിക്കുമല്ലോ. അതിനാൽ അവ യഥാവിധി ഫോണുകളിൽ കാണപ്പെടുന്നു. മലയാളത്തിനിതുവരെ ആണവ ച്ചില്ല് പിന്തുണ ആയിട്ടില്ല. ഇതൊഴിച്ചുള്ള എല്ലാ യുണീക്കോഡ് അക്ഷരങ്ങളും ഈ കുറുക്കുവഴിയിലൂടെ ദൃശ്യമാകും. (ഒട്ടുമിക്ക ഇൻഡിക് ഭാഷകൾക്ക് വേണ്ടിയും ഈ പാത സ്വീകരിക്കാം. ട്ടോ..)

ശ്രദ്ധിക്കേണ്ടവ :

  • ഡൗൺലോഡ് ചെയ്യുമ്പോൾ ഓപ്പറ മിനി അല്ലെങ്കിൽ ഓപ്പറ മിനി നെക്സ്റ്റ് ഡൗൺലോഡ് ചെയ്യങ്ക. ഓപ്പറ മൊബൈലിൽ ഈ കുറുക്കുവഴി സാധ്യമല്ല.

  • കഴിവതും പുതിയ പതിപ്പ് തന്നെ ഡൗൺലോഡ് ചെയ്യുക. മറ്റു സൈറ്റുകൾ വഴി ഡൗൺലോഡ് ചെയ്യുന്ന ഓപ്പറമിനി പതിപ്പ് 5.0ലും പഴയതായാൽ പണി പാഴാകും.

  • ഇതു മൂലം അക്ഷരങ്ങൾ ചിത്രങ്ങളാക്കി മാറ്റുന്നതിനാൽ അവ കോപ്പി/ പേസ്റ്റ് ചെയ്യുവാൻ സാധിക്കുകയില്ല.

  • ചിത്രങ്ങൾ കൈമാറ്റം ചെയ്യുന്നതിനാൽ ഡേറ്റാ ഉപഭോഗം കൂടിയേക്കാം.

സംശയം/അഭിപ്രായം ഇവിടെ നൽകുക

ആൻഡ്രോയ്ഡിൽ മലയാളം എഴുതാൻ

2011 ഡിസംബർ 27ന് നാരായത്തിൽ (http://narayam.in) പ്രസിദ്ധീകരിച്ചത്. ആർക്കൈവിങ്ങിനായി മാത്രം ഇവിടെ ചേർക്കുന്നു. സംശയം/അഭിപ്രായം അവിടെ ചേർക്കുക

ആൻഡ്രോയ്ഡിൽ മലയാളം വായിക്കാൻ സജ്ജമാക്കുന്ന വിധം തൊട്ടുമുൻപിലത്തെ പോസ്റ്റിൽ വായിച്ചുവല്ലോ. ഇനി ആൻഡ്രോയ്ഡിനെക്കൊണ്ട് മലയാളം എഴുതിക്കുന്ന വിധം നോക്കാം.
ഇതിനായി  ‘MultiLing Keyboard‘  എന്ന ആപ്ലിക്കേഷൻ ഇൻസ്റ്റാൾ ചെയ്യേണ്ടതുണ്ട്. ഐ. എം. ഇ.-യെ നിയന്ത്രിക്കാൻ കഴിവുള്ള ഈ എ.പി.കെ. ആപ്ലിക്കേഷൻ ആൻഡ്രോയിഡ് മാർക്കറ്റിൽ ലഭ്യമാണ്. മാർക്കറ്റ് ആപ്ലിക്കേഷനുപയോഗിച്ച് തിരഞ്ഞോ ഈ കണ്ണി മുഖാന്തരം ഡൗൺലോഡ് ചെയ്തോ ആപ്പ് ഡിവൈസിൽ സന്നിവേശിപ്പിക്കുക. (ആപ്ലിക്കേഷൻ സൗജന്യമാണ്) ശേഷം,

പടി 1:
മെനുവിലെത്തി ‘MultiLing Keyboard‘ എന്ന ആപ്ലിക്കേഷൻ തുറക്കുക

 

 

പടി 2:

തൊട്ടടുത്ത താളിൽ വരുന്നതിൽ മുകളിൽ കാണുന്ന ‘Enable MultiLing‘ എന്നത് ക്ലിക്ക് ചെയ്ത് വരുന്ന പേജിലെ ‘MultiLing Keyboard‘ എന്നത് സജീവമാക്കാനുള്ള ചെക്ക്‌ബോക്സ് ടിക്ക് ചെയ്യുക

 

 

 

 

 

പടി 3:
Switch IME to MultiLing‘ എന്നതിൽ ക്ലിക്ക് ചെയ്യുമ്പോൾ വരുന്ന ‘Select Input Method‘ എന്നതിൽ ‘MultiLing Keyboard‘ തിരഞ്ഞെടുക്കുക.

 

 

പടി 4:
Enable Languages‘ എന്നതിൽ ക്ലിക്ക് ചെയ്ത് (‘Download Plugins’ എന്നത് നിർബന്ധമില്ല. വേഡ് പ്രഡിക്ഷനാവശ്യമായ നിഘണ്ടുവാണ് അവിടെ നൽകിയിരിക്കുന്നത്) അതിൽ നിന്നും ‘മലയാളം‘ എന്നത് കണ്ടെത്തി ചെക്ക് ചെയ്യുക. (സ്വതേ ‘English’ എന്നതിൽ ചെക്ക് ചെയ്തിട്ടുണ്ടാവും അല്ലാത്തപക്ഷം അതും ചെക്ക് ചെയ്യുക) ബാക്കിയെല്ലാ ഭാഷകളും അൺചെക്ക് ചെയ്യുക.

പടി 5:
ഏതെങ്കിലും ഒരു എഴുത്തുപെട്ടി (ഉദാ: മെസ്സേജിങ്ങ് സ്പേസ്) തുറക്കുക. ഇപ്പോൾ പുതിയൊരു കീബോഡ് സ്കീം ആയിരിക്കും വന്നിരിക്കുന്നത്. ഇതിൽ മലയാളവും കാണും. ഭാഷകൾ സ്വിച്ച് ചെയ്യുവാൻ സ്പേസ് കീയിൽ അമർത്തിക്കൊണ്ട് ഇടത്തേക്കും വലത്തേക്കും ഡ്രാഗ് ചെയ്താൽ മതി. ഇതിൻ പ്രകാരം അധികം അധ്വാനിക്കാതെ തന്നെ ഐ. എം. ഈ. ഭാഷകൾ മാറാൻ കഴിയുന്നതാണ്. ഒട്ട് മിക്ക ഇന്ത്യൻ ഭാഷകളും (ആകെ നൂറിലധികം) ഈ സ്കീമിൽ ലഭ്യമാണ്. കൂടുതൽ ഭാഷകൾ സജീവമാക്കാൻ ‘Enable Languages‘ എന്നതിലെത്തി വേണ്ടവ ചെക്ക് ചെയ്താൽ മതിയാകും (പടി 4 കാണുക) അല്ലെങ്കിൽ Settings > Language and Keyboard > MultiLing Keyboard settings > Languages എന്ന പാതയിൽ സഞ്ചരിക്കുക.

 

 

 

 

ഇൻസ്ക്രിപ്റ്റ് (ഇൻഡിക് സ്ക്രിപ്റ്റിങ്ങ് സ്കീം) കീബോഡ് വിന്യാസത്തിന് സമാനമായാണ് മൾട്ടിലിംഗ് കീബോഡിൽ മലയാളം അക്ഷരങ്ങൾ ക്രമീകരിച്ചിരിക്കുന്നത്. ഇതിനാൽ ഇതറിയാവുന്നവർക്ക് ടൈപ്പിങ്ങ് എളുപ്പമാകും. (ലിപ്യന്തരണം ഉപയോഗിക്കുന്നവർ ആദ്യം കുറച്ച് വെള്ളം കുടിക്കുമെന്ന് സാരം) മലയാളം  പിന്തുണയ്ക്കാത്ത ചില ഫോണുകളിൽ MyScript ഇൻസ്റ്റാളേണ്ടതായി വന്നേക്കാം..

പ്രശ്നങ്ങൾ:

  1. നിലവിൽ ചില്ലക്ഷരങ്ങൾ പിന്തുണയ്ക്കുന്നില്ല. ഇതിനെ വ്യഞ്ജനത്തിന്റെ ബീജമായി എഴുതേണ്ടി വരും. ( ഉദാ: ൽ =ല് , ൺ = ണ് , ർ = റ് , ൾ = ള് , ൻ = ന് )
  2. കൂട്ടക്ഷരങ്ങളെ രണ്ട് വ്യഞ്ജനങ്ങൾ ചേർത്ത് എഴുതേണ്ടി വരുന്നതിനാൽ തുടക്കക്കാർക്ക് അല്പം ബുദ്ധിമുട്ട് തോന്നാം. (ഉദാ: ക്വ = ക് + വ, ക്ര = ക് + ര, ങ്ക = ങ് + ക, ണ്ട = ണ് + ട, മ്പ = മ് + പ, റ്റ = റ് + റ എന്നിങ്ങനെ)

ആൻഡ്രോയ്ഡ് ചന്തയിൽ നിന്നും ലഭ്യമായ ആപ്ലിക്കേഷനായതിനാൽ ഒട്ടെല്ലാത്തരം ഫോണുകളിലും പിന്തുണയ്ക്കുമെന്നും മറ്റ് പിഴവുകളൊന്നും കാണിക്കുകയില്ലെന്നും പ്രതീക്ഷിക്കുന്നു.

സംശയം/അഭിപ്രായം ഇവിടെ നൽകുക